Alfredo Hakarak Rezolve Problema ho Kondisaun

DILI – Komandante Polisia Militar, Major Alfredo Reinado Alves prontu 100% hakarak rezolve ninia problema, maibe tenki ho kondisaun.

Ekipa Advogado Major Alfredo, Benevides Barros ba STL iha Parlamentu Nasional, Segunda horseik hateten, nia kliente hakarakl entrega aan, tanba Eis Ministru Interior, Rogerio Tiago Lobato hetan ona kastigu hodi ba deskansa iha hotel perdaun (komarka), Becora-Dili.

Benevides afirma, iha 13 Maiu foin lalai nee, ekipa advogado haruka ona karta ba atu reforsa ou refiarma konaba sira nia kliente katak iha boa vontade 100% atu koalia konaba ba dialogu (persetujuan penyelesaain dame). Nebee, iha pontus rua nulu resin.

Kondisaun maka tenki hapara operasaun militar ho hakerek no publika ba media nasional no internasional. Kondisaun seluk, see Alfredo mai karik ho nia elementu sira tenki trata ho dignidade tomak nebee, governu sempre temi dala barak.

“Hau hanoin ami nia kliente ho nia elementu sempre responde positivu tebes konaba atu halo dialogu,” nia dehan.

Situasaun provas ona ba estadu RDTL katak sira nia kliente nunka provoka situasaun la diak, nebee ameasa siguransa nasional. Ameasa povu nia vida no liu-liu ameasa situasaun prosesu eleisaun prezidensial nebee fo liu dadauk.

“Nee provas ona ba governu katak Alfredo kalma iha nia fatin, respeita povu atu partisipa iha festa demokratiku nee,”nia hatete.

Sira nia kliente provas ona katak buat nebee nia atu hatoo ba Komisaun Altu Nivel (KAN) atu deskuti nia kumpri hotu kedas. Problema agora hasoru mak nee, governu hakarak estadu RDTL liu husi KAN nee hanoin para hapara operasaun nee ho hakerek ona ka seidauk? Tuir nia hanoin, kestaun nee kompetensia Prezidenti Republika (PR), Primeiru Ministru (PM), no membru sira seluk nebee mak hola parte iha KAN.

Konaba fatin dialogu, nia dehan, nee problema tekniku nebee sei desidi ikus liu. Kestaun importante, Benevides dehan, tenki trata nia kliente ho dignidade tomak hanesan moos sira seluk.

Tratamentu ho dignidade mak, Alfredo la bele tau iha prizaun preventiva, tanba Alfredo mos hanesan ema ofisial nebee seidauk hetan espulsa husi F-FDTL. Tantu, Alfredo iha direitu hetan tratamentu ho dignidade tomak husi estadu RDTL.

Tenki tau iha fatin ida ho siguransa nebee favorese, no kondisaun fatin nebee diak ba nia. Signifika, la iha situasaun ameasa, presaun politika, no seluk tan hodi respeita Alfredo nia direitu fundamental, tuir konstituisaun RDTL hatete. Tuir konvensaun internasional konaba direitus humanus nian, no moos tuir konvensaun internasional konaba direitu politiku no sivil sidadania ida nian.

“Importante ami lakohi tau lasu ba nia hanesan akontese iha 25 Julhu 2006. Tanba, ami husi ekipa advogadu laos analiza ba prosesu juridika, maibe analiza ba aspeitu sosial no politika ba ami nia kliente. Liu-liu ami nia kliente nia situasaun no pozisaun hanesan trunfu ida ba interese politika nasional,”nia koalia.

Konaba entrega aan, Benevides hatete, sira la koalia konaba kestaun nee. Intrega aan, tuir nia hanoin, wainhira governu hasai desizaun katak kaer Alfredo mate ka moris, sira la aseita. La aseita katak nee laos solusaun juridiku ba sidadania ida ke expresa nia direitu. Liu-liu ema forsa ida no moos nia estatutu nuudar komandante Naval F-FDTL no moos komandante interenu PM nian nebee too agora la iha karta ofial ida katak nia espulsa tiha ona.

Vice Prezidenti Komisaun B asuntu Defeza no Siguransa iha Parlamentu Nasional (PN), Clementino dos Reis Amaral komenta katak vontade Major Alfredo atu submete ba justisa hanesan pasu ida pozitivu tebes.

Alfredo sei iha utilidade tebes, tanba Alfredo mos hatene buat barak nebee tuir Clementino katak seidauk fo sai iha tribunal. Liu-liu konaba fahe kilat. “Durante nee, nia la dauk intrega aan, tanba nia hein katak ema nebee fahe kilat tenki hetan kastigu iha lai,” Clementino dehan. ira