Fretilin Mudansa Tuun Kampaina Lori CNRT ba Vitoria

DILI- Lider Grupu Fretilin Mudansa (GFM), Egidio de Jesus hateten katak sira prontu ona tuun iha kampaina partidu Congresso Nacional de Reconstrucão de Timor-Leste (CNRT) iha distritu no baze atu nunee lori vitoria ba partidu neebe lidera husi Kay Rala Xanana Gusmão iha eleisaun parlamentaria.

“Ami GFM neebe aliansi ho CNRT sei tuun hotu ba distritu iha kampaina lejislativa nian atu nunee bele lori CNRT ba vitoria,” hateten Egidio ba diariu nee, Segunda horisehik iha Dili.

Nia mos fiar katak militantes GFM sei aumenta tan iha eleisaun parlamentaria nian atu nunee bele hamutuk ho CNRT hodi kaer governu Timor Leste periode 2007/2012.

Egidio fo nia parabens ba militante GFM neebe ho ninian demokrasia alto nivel hodi haree buat lolos.

“Iha eleisaun prezidensial segunda ronde iha 9 Maiu ita hare katak militante hot-hotu li-liu povu TL tomak iha ona maturidade politika i liliu ba demokrasia ami GFM desde tinan 4 hare katak ho komportamentu lideransa ho sira nia lalatak povu la fiar ona, liliu povu maubere i ita hare katak ho eleisaun nee povu maubere-buibere fo duni justisa popular liu husi 9 Maiu ba lider Fretilin sira neebe iha Grupu Radikal Maputu para bele rekoinese realidade ida nee,” nia hateten.

Nia husu ba lideransa Grupu Fretilin Radikal Maputu, liliu Mari Alkatiri atu halo introkpeksaun tamba povu agora matenek liu ona no lakohi tan monu iha jogada politika foer nian.

“Hori otas hori wain, hori uluk ami hateten kedas katak Maromak nia lian, povu nia lian, povu nia lian, Maromak nia lian. Se lakohi halo intropeksi diri prepara aan deit atu simu derota aat liu iha eleisaun parlamentaria nian,” nia hateten.

Egidio haree katak estatementu neebe Mari Alkatiri nudar Sekretariu Jeral partidu Fretilin hasai durante nee hanesan virus ida nebee bele hamate nia aan no partidu rasik.

Nia hatutan tan, Alkatiri diak liu nonok halo intropeksi diri. Se nia reza Ami Aman hatene liu Ramos Horta, reza tan Ave Maria, Santa Maria, Gloria para tulun nia beik sala no diak liu bolu fali militantes Fretilin tomak mudansa ho radikal mai halo fali kongresu extra ordinariu.

Lideransa GFM nunka hirus pesoal Mari Alkatiri, maibe la gosta deit ho sistema neebe aplika iha partidu laran neebe sistema nee halo hanesan CV ka PT privadu Alkatiri nian.

Maski kandidatu prezidenti husi Fretilin, Francisco Guterres Lu Olo lakon iha eleisaun prezidensial nian, maibe GFM fo nafatin parabens ba Lu Olo tamba bele simu rezultadu ho diak no bele kontrola nia militantes hases aan husi hahalok violensia. agi