CNRT Manan Sei “Dasa Mos” Foer Governu Fretilin

DILI – Ezistensia partidu CNRT (Congreso Nacional Recontrucao Timor Leste) laos deit atu dezenvolve nasaun doben Timor Leste nee ba oin ho prosperiedade, maibe atu hamos foer hanesan Korupsaun, kolusaun no nepostisme nebee governu Fretilin kuda durante tinan lima governasaun. Nomos hakotu krize politika military nebee sei lao hela iha rai laran.

“CNRT hamrik atu halakon pratika KKN nebee moris buras iha governu Fretilin, korizi lei nebee governu Fretilin no parlamentu nasional halo tendensia fo vantazen liu ba interese partidu no governu Fretilin nian. Povu sei kiak ami nebee tuur iha governu, prezidensial no Parlamentu halo ona lei laos dei atu hetan pensaun, maibe livre taxa (pajak), sosa kareta laiha taxa, sosa bahan bangunan laiha taxa. Ami hakarak moris diak no luxu iha povu nia susar no terus leten,” esklarese Prezidenti partidu CNRT, Jose Alexandre Kay Rala Xanana Gusmao wainhira halo kampanye iha sub Distritu Manatuto, Tersa (5/6).

Reportazen jornalista STL, Jose Mendes iha Distritu Manatuto informa katak kampaina nebee lidera direita husi Prezidenti CNRT Xanana Gusmao nee hetan anima makaas husi populasaun. Kampaina nee hahu tara tais ba Xanana no lideransa Fretilin Mudansa i kontinua ho seremonia kultural no dansa suruboek. Militante no simpatizante CNRT nian barak mak marka prezensa iha kampaina nee, hodi hakilar viva CNRT, Viva Xanana no Viva Fretilin Mudansa.

Iha kampaina nee, Xanana hatete katak sala nebee governu Fretilin halo durante tinan lima tenki hamos tiha. Hahalok KKN ou politika foer nebee lori sofrementu naruk ba povu no nasaun nee sai krizi. Tanba nee tenki reforma lalais iha eleisaun nee. Tan nee CNRT ho Fretilin Mudansa hamrik atu halakon politika foer Fretilin.

Xanana hatoo mos programa partidu nian nebee atu halao iha rai nee, se iha elisaun hetan fiar husi povu hodi ukun nasaun nee, Programa prioridade CNRT nian mak atu harii uma ba veteranus, saude, edukasaun no agrikultura, hadia estrada iha distritu, sub distritu to suku. CNRT sei fo subsidiu ba veteranu, alezadus Falintil, faluk, dan oan kiak sira. Governu CNRT nia sei fo kbiit ba distritu sira atu jere nia rai ho orsamentu rasik.

Iha okaziaun nee Xanana husu ba povu Distritu Manatuto atu fo fiar metin ba partidu CNRT hanesan povu ba CNRT iha tinan 1999 nebee povu konsege duni sai indonesia iha Timor Leste. Tan nee atu dudu governu Fretilin nebee lori ona terus ba povu rai nee, povu tenki fo fiar ba CNRT atu halo mudansa ida iha rai nee. CNRT katak Xanana sei fo mahon ba ema tomak. Nudar partidu nebee uluk liberta rai nee husi okupasaun Indonezia, CNRT sei hamrik hanesan halimahon ida ba ema tomak iha rai nee.

Kampaine hahu iha sub Distritu Manatuto Vila ho Laklo. Partisipa iha kampanye nee lideransa Freilin mudansa, Jose Luis Guterres, Vitor da Costa, Vicenti Maubucy no lideransa CNRT tomak. Kampaina nee hetan siguransa metin husi UNPol ho PNTL no siguransa partidu CNRT nian.*