domingo, 10 de junho de 2007

Tribunal Desidi Arguidu Luis da Silva Tama Prizaun *Komandante Afonso Sedauk Hatene



DILI- Tribunal Distrital de Dili, Sesta (08/6), liu husi primeiru interogasaun judicial (hearing) desidi arguidu Ajenti Luis da Silva Guterres (PNTL) nebee tiru mate Afonso Kudalai iha Viqueque, Domingu (03/6) liu ba, tama iha prizaun preventiva hodi hein prosesu investigasaun.
Arguidu Ajenti Luis da Silva Guterres rasik desidi hodi intrega aan ba Polisia Nasional Timor Leste (PNTL) Stasaun Sub-Distritu Uatolari, Viqueque, Kinta liu ba, depois sai buronan durante loron haat nia laran.
Primeiru interogatoriu judicial ba suspeitu Luis nebee halao iha Tribunal Distrital de Dili taka ba publiku inklui ba jornalista i hetan seguransa makaas husi UNPol, PNTL nomos Guarda Nacional Republikana (GNR). Arguidu Luis lori ba tribunal ho hatais roupa kalsa badak mutin ho jaket mutin nebee uluk suspeitu hatais hodi hasai vitima Afonso nia vida.
Depois tiha prosesu interogatosaun durante oras rua nia laran, Prokuradoria kazu, Jose Ximenes ho Ivonia Guterres nebee kaer kazu nee ba jornalista hatete katak prosesu nee lao normal hanesan mos prosesu sira seluk.
Prokurador Jose rekuza atu komenta kona ba rezultadu interogasaun tanba iha segredu justisa nia laran. “Hau la bele koalia barak kona ba interogasaun nee,” nia hatete. Maski nunee nia dehan prosesu interogasaun ba arguidu Luis hotu ona, maibe la fo sai rezultadu tanba kazu nee sei iha segredu justisa nia laran.
Nia salienta katak depois interogasaun juiz internasional Telma Figeireiro hatun desizaun hodi hatama arguidu ba prizaun preventiva. Despaishu juiz nian nee koresponde ho buat nebee mak arguidu dehan durante iha interogasaun nia laran.
Arguidu nebee akompanha husi advogadu internasional, Pedro Andrade husi Public Defender depois tiha hetan desizaun husi tribunal nee, parte seguransa lori kedan arguidu ba prizaun.
Responde kona ba artigu hira mak parte Prokuradoria nian akuza ba arguidu, Jose hatan katak artigu nebee mak uza iha artigu 338 Kodegu Penal (KUHP) nebee hatete katak ‘ema nebee mak hadau ema seluk nia vida hodi oho ema seluk, nia sei hetan kastigu pena prizaun masimu tinan 15 iha komarka’.
Arguidu Luis: “ Tiru Kudalaek, tanba nia baku hau”
Iha parte seluk, bazeia ba prosesu interogasaun arguidu Luis da Silva konfensa ba tribunal katak nia tiru duni vitima Afonso dala haat, tanba vitima Afonso rasik mak baku uluk nian to monu ba rai.
“Hau mak tiru duni Afonso Kudalaek, tanba nia mak baku uluk hau to monu ba rai, nebee mak tempu nebaa hau hasai kedan pistola hodi tiru Afonso,” haktuir Jose.
Prokurador Jose mos rekonese katak durante prosesu interogatoriu nia laran, arguidu kolabora diak ho tribunal i responde perguntas nebee juis sira hatoo maske iha perguntas balu nia la bele responde. “Nee nia direitu,” Jose hatutan.
Arguidu Luis wainhira lori mai iha tribunal Sesta horseik ho kondisaun moras, tanba iha insidenti nee halo mos ninia ibun kanek.
Hanesan noticia nebee mak fo sai tiha ona, arguidu rasik liu husi aprosimasaun Ministeriu Interior nian, arguidu hakarak entrega aan ba Komando PNTL, laos UNPol. “Arguidu desde horseik kedan atu entrega aan, maibe arguido atu entrega ba Komandante PNTL no lakohi entrega an ba UNPol,” hatete Ministru Interior, Alcino Barris ba STL depois akompanha vizita Prezidenti Republika, Jose Ramos Horta ba iha Akademia PNTL, Komoro, Kinta horseik.
Iha fatin seluk, Komandante Interinu PNTL, Inspektur Afonso de Jesus hak-fodak hatete katak nia parte seidauk hatene ajenti Luis da Silva tuir prosesu hearing iha tribunal Dili. Tuir nia prosesu hearing seidauk bele halao tanba kondisaun saude suspeitu la diak.
“Prosesu hearing ba suspeitu sedauk bele halao tanba ami sei haree nia kondisaun. Mas kuandu ohin halao ona prosesu nee hau sedauk hatene tanba hau sedauk halo monitorizasaun ba ida nee,” dehan Inspektur Afonso ba STL liu husi telefoni horseik lokoraik. Inspektur Afonso informa mos kona ba suspensaun ba Komandante PNTL Distritu Viqueque, Gaspar da Costa. “Ba nia ami dezarma tiha ona pistola horibain rua, kareta nebee nia uza intrega ona horseik (Kuarta, red.) hau mos haruka nia tenki entrega,” hatete Afonso.
Suspensaun nebee komando PNTL foti tanba Gaspar da Costa viola ona regulamentu disiplinal PNTL. Duransaun suspensaun nee too Setembru hodi gein prosesu investigasaun en relasaun ho violensia nebee akontese iha Viqueque durante kampaine prezidensial no parlamentar.
Gaspar da Costa hetan suspensaun hodi tuir prosesu investigasaun relasaun ho kazu Makadiki nebee deskonfia membrus PNTL distritu nebee nia lidera involve iha kazu asalta militante no apoiantes prezidenti republika Dr. Jose Ramos Horta iha kampaina primeira volta eleisaun prezidensial Abril liu ba.
Iha parte seluk, tuir informasaun nebee diariu nee hetan husi populasaun Viqueque hatete katak Komandante PNTL Distritu Viqueque seidauk intrega, tanba sira sei haree Gaspar sei uza kareta nee lao ba mai iha Viqueque. arm/agi/car

Sem comentários: