Definisaun Estatu Major Alfredo Seidauk Klaru

Edition: 07 June 2007

DILI- Direitor Komisaun Justica no Paz Diocese Baucau, Pe. Martinho Gusmao husu ba governu no estadu atu defini uluk estatutu Komandante Polisia Militar, Major Alfredo Reinado Alves antes halo dialogu.

“Kuandu ninia estatutu seidauk difini lolos, hau hanoin mos Alfredo iha direitu atu subar aan, tanba wainhira sistema nee la favorese ba ninia kauza, entaun hau hanoin nia iha direitu tomak,” hatete Amu Martinho ba STL iha edifisiu Comicao Nacional de Eleisoins (CNE), Mascarinhas, foin lalais nee.

Amu Martinho isplika katak kazu Major Alfredo nian nee diak liu uluk tenki defini lai statute, nebee nia nee hanesan dezertor military nian ou nia nee kriminozu ka nia nee autor krimi politiku. Tanba, Amu Martinho hatutan, to agora seidauk iha definisaun klaru, entau governu ka estadu tenki hola lai medidas hodi halo definisaun ida konaba status Major Alfredo nian para hare nia nee politiku, military ou nia nee sidadaun baibain.

Relasiona ho igreija katolika, Amu Martinho hanoin katak pozisaun ida nee seidauk hasai purke igreija Katolika bele koalia ho Diocese Dili, mais Diocese Dili laiha autoridade atu manda Diocese Baucau. “Tanba kada diocese iha ninia otomonia, agora ami bele servisu hamutuk atu hare kazu ida nee, maibe ida nee laos signifika kuandu Prezidenti da Republika ou Ministeriu Publiku koalia ho Bispu Diosece Dili nian nee laos hatudu katak Bispu Diocese Baucau tenki tuir, nee mak buat rua ke la hanesan,” hatete Amu Martinho.

Ho nunee, Amu Martinho haktuir katak diak liu estabelese grupu trabalhu ida atu buat lao ba dialogu, maibe kuandu koalia ho Bispu ida mais ida seluk la ba konsulta nee mos la rezulta buat ida. Nee duni, governu bele koalia ninian, Prezidenti Da Republika mos kaolia ninian, mais igreija Katolika labele imajina katak igreija katolika nee diocese Dili deit. Tuir Amu Martinho katak kazu Major Alfredo nian nee laos fasil. Kazu Major Alfredo nian nee kazu ida kee iha ninian sirkuntansia hanesan lingkaran setan.

Nia mos hatutan katak agora atu koalia konaba dialogu, mais topiku ou asuntu saida mak atu tau iha meja leten hodi halao dialogu. See kazu Major Alfredo halai sai husi Kuartel Militar nian, nee kazu nia ho Brigadeira Taur Matan Ruak, ho nunee igreija tama iha neba atu halo saida. Iha parte seluk, kazu Major Alfredo tiru iha Fatuahi no halai sai husi prizaun, nee nia ho Ministeriu Publiku. No kazu dehan katak iha manipulasaun iha laran nebee hakarak estraga povu ka nasaun, nee kazu politika, no ita dialogu konaba buat nee, maibe laos buat hotu ita halo dialogu. arm