sexta-feira, 1 de junho de 2007

varias noticias em tetum

Osan Mina Rai Tenki Investe iha TL


DILI– Segundu Vice Reitor UNTL, Fakuldade Ekonomia, Rui Gomes, hatete atu halakon trabalho infantil no redus probreza, osan fundu petroleum tenke investe iha rai laran ho programa dezenvolvimentu atu loke kampu servisu iha rai laran.

Rui hatete lia hirak nee liu husi ninian diskursu iha serimonia graduasaun Fakuldade Ekonomica iha GMT Kuarta (25/4).

Nia hatete, osan fundu petroleum nebee investe iha estranjeiru tenki transfer mai Timor Leste no investe iha rai nee hodi loke kampu servisu ba povu iha rai laran.

Osan nee mos tuir nia fahe ba povu kiak sira tuir uma kain ida-ida atu nunee sira bele hadia sira nian vida moris.

“Nee mak bolu dehan halo lakon trabalho infantil, hatun kualidade infantil, hakiak saude no edukasaun labarik sira nian,” nia komenta.

Governu katak Rui tenki fo ajuda ba labarik husi tinan 7 too 15 au sira bele uza ba eskola fali. Tanba faktus balu hatudu katak labarik barak husik hela eskola hodi buka servisu tanba inan aman la iha servisu. Sira faan kartaun, jornal, aifuan, no modo iha dalan-dalan, tanba hakarak buka osan hodi ajuda sustenta ekononia uma laran.

Rui propoin ba governu atu fo mos subsidi ba ema idade boot husi tinan 50 ba leten, atu nunee sira bele uza hodi sustenta moris lor-loron no halo tramentu saude.

Fo bolsu estudu ba labarik sira neebe matenek, nebee la kontinua sira nia eskola tanba ekonomia inan aman, no fo subsidi ba povu kiak sira distritu no sub distritu atu hodi haburas ekonomia povu.

Uza osan mina rai nian hodi kria sentru desportu ho sentru konvive ba joventude sira, halo mudansa fundamentais loke servisu iha distritu ho Sub-Distritu hodi fo tempu ba joven sira neebe agora dadaun laiha servisu.

Atu realiza katak Rui depende ba politika will ukun naun sira ba povu nasaun nee, se ukun nain sira hanoin deit dezenvolvimentu ba nia rasik, maske Timor toba iha riku leten, ema ida rua mak sei goza i povu moris nafatin iha kiak nialaran.gec

Railos La Kohi Prosesa Uluk Nia Kazu


DILI – Eis komandante grupu sekreta Fretilin, Vicente da Conceicão alias Railos la satisfas, bainhira prosesa uluk kazu tiru malu iha Tibar.

Nia husu ba Tribunal no Prokurador Jeral atu prosesu kazu krizi nee husi nia hun iha 28 Abril 2006 ba oin.

Tuir nia haree kazu fahe kilat hotu tiha ona, nebee nia rezultadu eis Ministru Interior Rogerio Tiago Lobato tama ona iha tribunal perdaun, Becora. Maibe, konaba vitima nebee mate durante krizi, nebee nia mos hola parte iha kazu nee, Railos husu atu loke husi problema manifestasaun petisionariu nian. “Mate laos hahu iha 24 no 25 Maiu, maibe 28 Abril. Neduni, tenki hahu husi nebaa” katak Railos ba jornalista, Kinta liu ba.

Railos rekonhese katak nia involve aan iha kazu tiru malu Tibar, maibe nia husu atu tribunal no Prokurador Jeral hatudu nia imparsialidade hodi haree husi huun. “Hau la halai husi tribunal. Maibe, tenki liu husi prosedur nebee mak iha,” Railos hatutan.

“Krizi nee mai husi nebee? Nee mak tenki uluk, se lae ita la independen ona,” nia haktuir.

Nia la simu bainhira dehan autor fahe kilat tama ona kadeia, hodi nunee nia mos tenki tuir. Nia hatete, ema Fretilin radikal husu atu Railos tenki tama iha kadeia. Maibe, nia rekonhese deklarsaun nee hasai illegalmente.

Antes nee, Prokurador Jeral Republika Longuinhos Monteiro hatete, akontesementu tiru malu nebee husi Railos iha ona prosesu investigasaun nia laran.

Iha semana liu ba prokurador nebee kaer kazu Railos hatete ona ba Longuinhos katak prosesu kazu Railos nian iha ona dezenvolvimentu.

“Karik, iha semana oin Prokuradoria ka tribunal sei foti medidas hodi hare ba prosesu nee,” hatete Longinhos Monteiro.

Longuinhos mos hatete, kontinuasaun prosesu kazu Railos nian ketak, prosesu nee iha ninia dezenvolvimentu no iha inisiativa barak ona hodi avansa prosesu nee ba oin.

Nia hatete, akuzasaun ba Railos nian konaba akontesementu tiru malu iha 24 Maiu 2006 iha Tibar, nebee rezulta ema balu mate. Neduni, ninia responbaliza mak ema mate. “Nia (Railos) iha direitu atu defende aan, maibe tenki hataan ba justisa tansa mak ema mate,” katak Monteiro. dd

Vitima Krizi 2006 Estadu Sei Tau Matan


DILI – Prezidenti Republika, Dr. Jose Manuel Ramos Horta hateten, estadu ho governu sei la haluhan no sei tau matan ba oan kiak no feto faluk sira nebee lakon ona sira nia familia durante krize.

“Governu no estadu sei tau matan ba Membru Polisia Nasional Timor Leste (PNTL) no populsaun sivil nebee mate durante krize nee akuntese, “ hateten Horta ba jornalista sira wainhira partisipa iha inagurasaun monumentu ba Tragedia 25 Maiu 2006, Sesta horseik, iha Dili.

Horta esplika, buat hirak nee obrigasaun estadu nian no Prezidenti Republika nebee servisu ho governu no parlamentu para todan sira nee responsablidade partensia ba estadu tenki halo lao duni ba oin.

Nia husu ba membru estadu tomak, no Timor oan hotu atu halo reflesaun ba krize nebee akuntese iha nasaun nee nia laran ho honestidade hodi husu ba ida-idak nia aan tanba sa mak buat nee mosu.

“Akuntesementu 25 Maiu 2006, hanesan loron nebee triste teb-tebes no halo ita hotu moer. Moe tanba lideransa la iha.

Lideransa nasional monu tiha. Instituisaun balu nakfera, e povu barak mate. Forsa rua nebee atu tau matan ba seguransa povu nian mak fila tiru malu fali,” Horta sublinha.

Halo inagurasaun ba monumentu nee, atu fo homenajen ba sira nebee lakon sira nia vida atu halo reflesaun ba buat nebee akuntese iha nasaun nia laran iha tinan kotuk atu labele akuntese tan iha futuru.

Nudar Ministru Estrageiru nebee kaer mos pasta hanesan Ministru Defesa iha tinan kotuk, Horta mos sinte laran susar no kanek hodi ba vizita iha Hospital Nasional Guido Valadares (HNGV) wainhira haree membru PNTL ho F-FDTL nebee toba iha nebaa.

Horta mos husu atu ema hotu tenki halo reflesaun wainhira inagura monumentu tragedia 25 de Maiu 2006, nunee labele akuntese tan iha nasaun nia laran.

Iha tina 24 nia laran, herois barak nasaun nee nian mak mate, elementu, heroiku., hahuu husi Nicolau Lobato, ema atus ba atus mak fo sira nia vida, estadu hahuu iha 2000, antes transperansia soberania ba TL halo inagurasaun avenida dos matris da patria nebee hahuu iha Tribunal Rekursu too estadu.

Estadu fo kbiit no defikuldades oi-oin, fo fiar ba Rrezidenti Republika hahuu servisu komisaun nian atu fo menajen ba veteranu sira. ida nee hahuu iha tinan kotuk maibe seidauk remata.

“Iha semiteriu herois Metinaro, esperensia sira nee, dalaruma ita halo ho inisiativa nunee. Ita tenkii halo refleksaun ba todan nebee povu simu hodi hetan liberdade no dame,” Horta propoin.

Nia hateten, durante krizi nee, vitima laos PNTL deit, maibe F-FDTL, populsaun sivil, inklui mos labarik kiik oan sira.

“Hau fo paravens ba Ministeru Interior nebee ho nia inisiativa ida nee para hatudu nasaun nia hadomi ba ema sira nebee mate iha tinan kotuk,” Horta hateten. nis

Komandante Operasaun Sentru Instrusaun F-FDTL Rezigna Aan


DILI – Komandante Operasaun Sentru Instrusaun F-FDTL Metinaro, Tenenti Infantaria Melio de Jesus ho Nim 016701 rezigna aan.

Rajaun fundamental Tanenti Melio rezigna aan husi instituisaun militar tanba hetan akuzasaun husi nia komando nuudar autor ba probelma petisionariu.

“Hau hetan kondenasaun husi komando F­FDTL nudar elementu ida husi grupo Petisionario. Tanba nee hau deklara rezigna aan,” haktuir Tanenti Infantaria Melio iha konfenresia imprensa nebee halao iha Dili, Sesta horseik.

Nia dehan, bainhira porta voz grupu petisionariu sira hatama petisaun, iha tempu hanesan, Melio mos hatoo nia keisa ba komando F-FDTL. Ho ida nee, Melio hateten, Komando F-FDTL kondena kondena nia, katak nia mak autor ba petisaun.

“Hau hakarak deklara iha nee katak hau la hatene problema petisionariu. Espekulasaun nebee komando halo ba hau la bajeia ba investigasaun klaru,” Melio haktuir.

Hafoin rezigna aan, Melio hakarak involve aan iha vida politika hodi kolabora no fo kontribuisaun hamutuk ho F -FDTL, Petisionario, Grupo Komanadante Polisia Militar, Major Alfredo Alves Reinado hodi rezolve problema nebee bele garante paz, estabilidade no seguransa ba povu Timor Leste.

Iha loron nee kedas, Melio mos hatoo rezignasaun offisialmente no entrega atributu militar nian ba Komandante F-FDTL Brigadeiru Jeneral Taur Matan Ruak iha Kuartel Jeral Tasi-Tolu.

Buat nebee mak nia halao tuir instrusaun administrativa regulamentu UNTAET No 1/01/2001, katak membru F-FDTL nebee afilia ka eleitu tenki rezigna aan.

Nia dehan, rezignasaun nee foti tuir nia konsensia no hakarak rasik. Neduni, karik iha loron ikus mai kontra fali deklarasaun rezignasaun nee, nia prontu hataan no responsabiliza iha lei nia oin.

Tama PMD

Hafoin deklara rezigna aan, Melio haktuir, nia sei afilia ba Partidu Mileniu Demokratiku (PMD). Tanba kunsidera katak manual politiku PMD mak diak liu hotu.

Bainhira iha instituisaun militar nia laran, Melio sempre akompaina dezenvolvimentu partidu politiku. Tanba nee, bainhira rezigna aan husi militar nia desidi kedan tama ba PMD.

Iha fatin hanesan Prezidenti PMD Ermenegildo Lopes ‘Kupa’ hatete katak Melio de Jesus iha direitu fundamental bajeia ba konstituisaun hodi tama ba partidu politiku. PMD laiha obrigasaun ba Tenenti Melio atu rezigna aan hodi tama ba PMD. Maibe, tanba haree vizaun politika PMD iha seitor hotu-hotu diak, neduni nia hakarak tama ba PMD.

Kupa hatete, ida nee sei la afeta ba Melio iha internal partidu PMD nian no la afeta ba instituisaun FDTL, tanba Melio halo ona rezignasaun bazeia ba disiplina militar nebee lei eziste iha instituisaun militar nia laran.

Nia dehan, PMD la iha komprimisu ho Melio hodi sai husi instituisaun militar atu tama iha partidu nee.

“Ami lakohi halo komprimisiu ba interese individu no grupu nian”. Nia hatutan, PMD hakarak iha vizaun politika diak bazeia ba plataforma partidu hodi dezenvolve nasaun nee no mos hasai povu husi krizi nee. dd

Monumentu Trajedia 25 Maiu 2006 Inagura


DILI- Prezidenti RDTL, Dr. Jose Ramos Horta ba dala uluk depois simu kargu prezidenti RDTL iha 20 Maiu liu ba, halo asinatura ba inagurasaun Monumentu Trajedia 25 Maiu 2006.

Monumentu nee harii atu valoriza membrus Polisia Nasional Timor Leste (PNTL) nebee mate durante iha krizi tinan kotuk liu ba nee.

Membrus PNTL nebee mate durante iha krizi tinan 2006 hamutuk nain sanulu resin ida. Membrus PNTL nebee mate uluk iha krizi maka, Sub Inspektur Anumerta Palmiro Lacerda. Matebian nebee servisu nudar polisia Unidade Intervensaun Rapida (UIR) tanba hetan sona husi massa iha Gleno, Distritu Ermera, iha 8 Maiu 2006 bainhira halao seguransa ba eis Sekretariu Estadu Rejiaun III, Egidio de Jesus hamutuk ho nia kolega.

Depois matebian Lacerda, tuir fali Sub Inspektur Anumerta Cipriano Anastacio Ximenes. Matebian Cipriano mate bainhira hetan ataka husi grupu rebelde xefia husi Major Alfredo Reinado Alves iha Fatuahi, 23 Maiu 2006.

Mate terseiru membrus PNTL nian maka Rekruit Ajenti Mariano Alves. Matebian mate iha Marabia tamba tiru malu ho soldadu F-FDTL neebe halao seguransa iha residensia Brigadeiru Jeneral Taur Matan Ruak iha 24 Maiu 2006. Matebian mate antes simu pose offisialmente nudar membru PNTL foun.

Ikus liu maka membrus PNTL nain walu neebe mate iha masakre 25 Maiu 2006 iha dalan Edifisiu Minesteriu Justisa nia oin.

Sira nain walu nee maka Sub Inspektur Anumerta Santiago Rego Goncalves (UIR), Sub Inspektur Anumerta Manuel Amaral (UIR), Sub Inspektur Anumerta Pasqual Ornai Carvalho (UIR), Sub Inspektur Anumerta Mario da Costa, Sub Inspektur Anumerta Martinho Falcão, Sub Inspektur Anumerta Thomas Alfredo (Academica), Sub Inspektur Anumerta Paulo da Costa (Komunikasaun i Informasaun), no Sub Inspektur Anumerta Domingos Guterres (Distritu Dili). Matebian sira nee mate tamba hetan tiru husi soldadus F-FDTL.

Seremonia inagurasaun nee hahu ho misa nebee diriji husi Mgr. Jose Antonio nebee iha litura bee lee husi vitima 25 Maiu 2006 maka Ajenti Aurelia da Amaro (Rekursu Umanus), no Ajenti Nelson Maia (Task Force). Nain rua nee agora lao hela ho ai tonka tamba hetan tiru seriu iha sira nia ain no kelen.

Suasana haru terlihat jelas iha litura nebee lee husi Aurelia ho lian tanis tamba nia selamat husi masakre nee. Lian tanis ho matan been monu husi matan familia vitima matebian sira.

Depois misa, seremonia kontinua ho kari aifunan nebee halao husi polisia UIR, nebee tuir mos oan feto husi matebian Sub Inspektur Anumerta Manuel Amaral. Antes kari aifunan, oan feto matebian Amaral ho naran kompletu Sofia Gorlin Cristalia Gomes Amaral (tinan 6) akompanya husi membru UIR ida entrega karta ijijinsia nebee hatama iha envelope koor coklat ba Prokurador Jeral Republika, Longuinhos Monteiro, neebe simu husi Xefi Prokuradoria Distritu Dili, Aderito Tilman.

Seremonia kari aifunan sempat tertunda tamba hein eis prezidenti RDTL, Xanana Gusmão neebe promete sei hola fatin iha seremonia inagurasaun monumentu nee.

Iha kari aifunan Prezidenti RDTL, Ramos Horta no Xanana Gusmão hetan penghargaan ba dala uluk. Iha kari aifunan nee Ramos Horta lori aifunan ho modelu korasaun koor mean no Xanana Gusmão ho aifunan modelu kruz koor azul.

Aifunan Ramos Horta nian tau iha ain rate matebian Mario da Costa, no Xanana Gusmão nian kari iha matebian Paulo da Costa. Tuir fali Primeiru Ministru Estanislau kari iha matebian Martinho Falcão.

Eis Komandante Jeral PNTL, Paulo Fatima Martins mos hetan penghargaan ba kari aifunan iha monumentu nia membrus sira nee. Nunee mos Vise Reprezentante Espesial Sekretariu Jeral ONU ba UNMIT, Eric Tan Huck Gim, Komisariu Interinu UNPol Herman Prit, reprezentante husi F-FDTL, reprezenta husi Kapitaun Jeki, ministru, deputadu/a parlamentus nasional, korps diplomatiku, no membrus PNTL sira.

Maibe, antes kari aifunan, Prezidenti Ramos Horta asina uluk batu nisan ba monumentu nee.

Isak tanis rona makas iha seremonia kari aifunan wainhira feen no oan, i inan aman husi matebian sira ba lori aifunan ba rate monumentu matebian sira neebe harii iha dalan ninin ba fatin neebe sira hetan masakre.

Loron inagurasaun monumentu nee mos atu selebra tinan ida trajedia fakar raan no masakre neebe akontese ba membrus PNTL wainhira halao servisu serve nasaun iha tinan kotuk liu ba.

Iha ikus liu, estudante Fakuldade Sosial no Politika husi Universidade Nasional Timor Leste mos hatoo sira nia kondolensia iha loron ba tinan ida trajedia 25 Maiu 2006. Estudantes sira nee lori espaduk boot ho koor metan neebe hakerek Loron 25 Maiu loron refleksaun ba Timor Oan Hotu. agi

PNTL Nebee Mate iha Krizi Hetan Nafatin Vensimentu


DILI – Ministru Interior, Alcino Barris hateten, sira nebee mate durante krizi sei hetan vensimentu tuir klasifikasaun sub inspektur.

“Ami mos proposta ba Eis Primeiru Ministru Marii Alkatiri katak wainhira PNTL seidauk iha lei defensaun, matebian sira sei hetan vensimentu tuir klasifikasaun sub inspektur. Propsta nee hetan aprovasaun no kontinua fila fali too agora,” hateten Alcino Barris ba jornalista sira wainhira partisipa iha misa inagurasaun Monumentu Tragedia 25 Maiu 2006 iha Dili, Sesta horseik.

Barris hateten, durnate tinan ida nia laran, wainhira hanoin halo monumentu ba matebian PNTL sira, hanesan knar todan nebee tula iha Ministeriu Interior nia kabaas.

Nee mos hanesan respeita reintegridade PNTL nian no kumpremisiu ba familia matebian sira nian. Parte seluk ejijensia reorganizasaun mai husi instiuisaun PNTL nebee lakon tempu no vantajen.

Nia hateten, rekonstruksaun ba monumentu nee, hetan apoiu orsamentu husi orgaun soberanu hanesan governu ho eis Prezidenti Republika, Kay Rala Xanana Gusmao.

Parojetu nee hahuu kolokasaun iha Marsu 2007 nunee buka kompanya hodi halo levantamentu. Too ikus mai hatama proposta hodi hetan apoiu orsamentu.

Nia esplika mos katak orasmentu ba projetu rekonstruksaun nee mai husi Eis Prezidenti Xanana US $7.419,72, Gabineti Parlamentu Nasional US $7.409,72, Gabineti Primeiru Ministru, US $7.419,70 no Reprezentante Espesial Sekretariu Nasoens Unidos US $7.409, 72. Total orsamentu ba monumentu nee US $29.648,48.

“Ohin ita halibur malu iha fatin ida nee atu komemora sermonia inagurasaun ba monumentu membru PNTL nebee lakon sira nia vida ba nasaun durante krize. Liu-liu ba membru PNTL sira nebee mate iha 25 de Maiu 2006,” Barris hateten.

Hanoin atu halo monumentu nee, hahu kedas iha Juinu 2006, wainhira familias vitimas sira ba hasoru Ministru Interior hafoin atu foti no lori matebian sira nia isin husi Hospital Nasional Guido Valadares (HNGV) hodi ba hakoi iha ida-idak nia moris fatin. Ministeriu Interior iha tempu nebaa hasoru defikuldades oi-oin. Tanba tenki reorganiza fali PNTL nebee namkari, reorganiza administrasaun PNTL distritu hodi atende PNTL iha distritu.

Ministreriu Interior rekoila armas sira nebee PNTL lori namkari. Reorganiza ministeriu interior hodi atende servisu ho diak konsega kontribui hanesan promove sira husi agente ba inspektur ho ajudu orsamentu nebee minimu. nis

Deputadu Halo Lei Hanesan Tuur Iha Restorante


DILI – Prezidenti Republika, Jose Ramos Horta, deklara katak deputadu sira iha Parlamentu Nasional halo amandamen lei eleitoral tuir sira nia gostu hanesan wainhira tama iha restorante.

“Ita nia deputadu sira halo lei hanesan los ita tama restorante. Ohin ita han la gostu, aban troka fali menu saluk,” dehan Horta iha nia palestra workshop iha sede ETDA, Hudi Laran, Kinta horseik.

Xefi Estadau nee hatete, Deputadu sira iha PN sira nia komportamentu la bele hanesan preman sira wainhira ba han iha retorante.

Tur nia haree katak PN halo amandemen eleitoral nunka koordena ho STAE no CNE. Hahalok nee bele sobu buat nebee CNE ho STAE halo ona iha semana nia laran. Nee duni tuir Horta, hakarak rona husi parte oi-oin ba amandemen nee atu hatun desizaun bele fo satisfasaun ba partidu hotu.

Nia hatutan, eleisaun tenki fear ba kiak no fraku sira, laos deit ba boot ka deputadu sira. No lei nee tenki refleta ezizensia partidu hotu nia.

“Hau sei buka hetan konsensus ho deputadus sira ho STAE no CNE no lider hotu-hotu ho hanoin ida deit fo kondisaun diak atu eleisaun bele lao lolos. Tanba kondisaun nee sei grantia ba estabilidade seguransa iha futuru durante no depois eleisaun” Horta propoin.

Amandemen diak maibe iha pontus balu iha laran mak ladun diak no la justu, hanesan la tau fotografia iha boletin de votus. La bele subar iha simbolu no bandeira nia kotuk, tenki transparensia para povu bele koinese.

Horta mos duvida konaba mudansa de votus husi nivel stasaun votus ba fali iha distrital. Tuir Horta meu lei nee hakarak atu halo manipulasaun.

Horta haktuir hakarak konsentra liu ba seguransa no eleisaun, tamba se ita koalia kona ba povu, povu laos tamba eleisaun deit maibe uluk kedas sira preokupa deit maka seguransa. Eleisaun sira hateten seguransa, seguransa laos deit husi UNPOL, PNTL, F-FDTL no ISF seguransa tenki mai mos husi komportamentu lider nasional sira, lider politiku sira, lider komunidade, lider sosiadade hodi fo kontribuisaun ho lia fuan no hahalok para kontribui ba seguransa. bre

Horta ho Komando F-FDTL Buka Dalan ba Petisionariu


DILI – Prezidenti Republika, Jose Ramos Horta, Kinta horseik, halao vizita ofisial ba Kuartel Jeral F-FDTL, Tasi Tolu-Dili, hodi haree besik liu tan servisu no fasilidade F-FDTL durante nee.

Iha vizita ba dala uluk Horta nian hanesan mos Komandante Supremu F-FDTL nee simu dereitamente husi Brigadiru Jeneral, Taur Matan Ruak, Koronel Lere Anan Timur, Tanenti Koronel Falur Rate Laek, no membru hirarkia komando F-FDTL sira seluk.

Prezidenti Horta ba jornalista sira hafoin vizita nee haktuir katak iha vizita nee nia mos konsulta ho komando F-FDTL hodi haree situasaun membru petisionariu nebee husik hela Kuartel Jeral F-FDTL iha tinan kotuk.

“Hau agora hein atu simu Tanente Gastao Salsinha ho nia kolega sira. Hau hakarak simu sira iha nee ou semana oin mai hodi koalia ho sira ba ideias nebe hau hetan atu hatun desizaun ida mai husi estadu,” Horta hateten.

Ideias desizaun nebee nia hasai lori estadu nia naran ba situasaun petisionariu nee, nia konsultao na ho eis Prezidenti Xanana Gusmao, Primeiru Ministru Estanislau Aleixo da Silva, no Amo Bispo sira.

Horta hatete, nia prontu koalia ho petisionariu sira nuudar povu nia oan para bele hetan solusaun ba situsaun problema sira nian.

Husu konaba komando F-FDTL sei simu fali Petisionairu, Horta hatete, solusaun ba problema nee nia hanoin iha semana ida ka rua nia laran, kuandu nia hatun desizaun maka foin hatene lolos.

Ba oin, Horta buka hakaas aan sei koalia nafatin hodi esplora ideias, sukat ideias oin-oin para bele rezolve situasaun iha F-FDTL nia laran. Maibe, tuir Horta, tenki tau importansia katak forsa armadas laos funsionariu publiku no laos instituisaun bai-bain, maibe instituisaun nebee espesial presiza tau matan ho diak tuir disiplina komando nian.

“Hau lakoi loke prezedente hodi ema bele tama sai tuir nia hakarak. Hau konpriende difikuldades nebee iha F-FDTL nia laran tanba forsas foun. Tranzisaun husi forsas rezistensia mai forsas modernu, hanesan sira hotu nebee foun sempre hetan difikuldades. Ita iha problema laos kria problema liutan. Kuandu ita tau problemas nee hodi haree no sukat buat hotu-hotu,” Horta tenik.

“Hau hein Advogadu Alfredo nian ho Prokurador Geral Republika mos hakat ba koalia ho Amo Bispo atu lao ba oin rezolve lalais kazu grupu Major Alfredo Reinado Alves ,”dehan Horta.

Iha fatin hanesan, Brigadeiru Jeneral Taur Matan Ruak, lori komando F-FDTL nia naran hatete katak sira kontenti tebes ho vizita ba dala uluk Horta nian nebee hatudu katak Horta sei la haluha forsa nasaun ida nee nian.

Iha ekontru nee diskuti sobre forsas nee ninia fungsaun ba iha medio no longu prazu.

Konaba kazu Petisionairu nian, Taur tenik, komando F-FDTL prontu koopera para halo buat hotu hodi lori fila fali moris hakmatek no paz ba povu.

Tuir Taur katak kazu petisionairu nian atu rezolve tenki liu husi dialogu hodi koalia ba malu atu hetan nia solusaun.

Atu simu fali Petisionariu sira ou lae, Taur dehan, nee desizaun iha estadu nia liman. See desizaun nee la influensa futuru instituisaun nian no nasaun nian, maka tuir Taur, komando F-FDTL prontu koopera. bre

Insidente 25 Maiu 2006, Reflesaun ba PNTL ho FDTL


DILI – Prezidenti Republika Jose Ramos Horta husu ba instituisaun rua F-FDTL no PNTL atu hola ho laran luak halo reflesaun ba insidente 25 de Maiu 2006, nebee rezulta membru PNTL mate iha Ministeiru Justisa nia oin nomos membru F-FDTL nian balu mate iha krizi nia laran.

“Ohin tinan ida ita hanoin hikas fali insidente fakar ran 25 Maio 2006 liuba sai hanesan imazen at atu la bele mosu tan iha ita nia moris ba oin. Ita tenki halo refleksaun, izame konsensia, ba Problema nebee labele akontese tan iha nasaun no mos la bele akontese tan iha PNTL no F-FDTL nia laran,” Horta hateten iha nia deskursu wainhira halao vizita ba Kuartel Reral PNTL, Kinta horseik.

Horta sublinha ktak F-FDTL ho PNTL mak tenki hatudu exemplu liu kona ba unidade nasional no desiplina para la bele iha tan problema iha instituisaun rua nee nia laran. “Hau mai too iha nee para atu tau matan no u hametin forsa rua nee para povu bele iha konfiansa. Se imi nia hahalok no komportamentu. Hahalok diak no disiplina makas povu sei toba hakmatek, lao ba mai iha luron ho livre tanba buta sira nee depende ba imi,”dehan Horta ho konsensia.

Estabilidade, dame, lei no Ordem iha nasaun nee depende ba instituisaun rua nee. Uluk kedas hau sae PM hau iha ona komprimisu atu buka taka kanek iha PNTL no F-FDTL nia laran, entre PNTL-F-FDTL no mos ho kumunidade en jeral.

Iha fulan nee nialaran ita atu hahu eleisaun hau hamrik iha nee apelu ba Polisia, labele monu tan iha maipulasaun politika, labele monu tan iha tentasaun atu halo politika, Polisia tenki netral 100%. Tenki hatudu nautralidade se PNTL monu ba politika nasaun sei lakon. Tuir konstituisaun PNTL garante etabilidade no paz.

“Hau sei buka tulun makas ba intituisaun rua nee govenru ho PN foun mai nee preoridade ida kondisaun vensimentu no logistika ba instituisaun rua nee, tanba PNTL no F-FDTL laos funsionariu bai-bain,”Horta promete. br

CNRT Salva Fretilin


DILI – Partidu Congresu Nasional Rekonstruksaun Timor Leste (CNRT) iha esperansa manan iha eleisaun lezilativu oin mai. Partidu nebee lidera husi eis Komandan Falintil, Kay Rala Xanana Gusmao nee garante katak seimanan 40%.

“Iha konfiansa katak ami manan. Ami sei manan 40 pursentu, nee tarjetu,” dehan Koordenador kampaina CNRT, Francisco Kalbuadi Lay liu husi konferensia imprensa iha sede CNRT, Bairo Grilos, Dili, Kinta horseik.

Nia hatete, CNRT moris tanba situasional. Neduni, desde harii too kongresu, iha ona konkluzaun katak sei manan maioria. Laos CNRT deit, maibe partidu hotu-hotu iha mundu tomak harii ho ambisaun ida deit, manan iha eleisaun.

Partidu CNRT lakohi hanesan partidu balu nebee mak garganta uluk-uluk dehan, manan absolutamete , maibe ikus mai lakon ho dignidade. Vice Prezidenti CNRT Virgilio Smith hatete, CNRT laiha amibisaun atu manna 90%. Maibe iha komprimisiu para manan ho persentazen nebee bele ekilibru iha Parlamentu hodi halo mundasa estatutu. “Sei manna ho persentazen nebee ekilibri.”

Koordenador kampaina CNRT Kalbuadi enti laiha partidu ida mak sai pesaing ba partidu CNRT. Maibe, eleisaun nee festa demokrasia nebee fo oportunidade ba ema hotu-hotu atu partaisipa nudar Timor oan. “Nia hatutan, bele bersaing, maibe tenki sehat.”

Bainhira la hetan votus maioria iha Parlamentu Nasional, CNRT sei halo koligasaun. Maibe too seidauk deklara koligasaun nee atu halo ho partidu nebee. “Sei halo koligasaun depois rezultadu eleisaun,” tenik Lay.

Primeiru Kampaina Iha Lospalos

Hela loron hat (4) kampaina Partidu politiku ba eleisaun lezislativa atu hahu. Partidu CNRT hili distritu Lautem sai primeiru kampaina (perdana), tanba distritu nee hanesan tutun. Koordenador Francisco hatete, primeiru Star kampaina nee deside liu husi tuir reuniaun ho koordenador distritu hotu-hotu.

Komisaun Nasional Eleitoral (CNE) no Sekretariadu Tekniku Administrasaun Eleitoral (STAE) fo tempu ba partidu politiku sira hotu atu halao kampaina durante fulan ida nia laran. Neduni, nebee mak nesesariu CNRT sei too iha neba hanesan aldeia no suku.

Partidu CNRT mos iha ekipa kampaina tekniku no ekipa estuda nebee sei aprezenta programa iha kampaina. Programa importante atu faan iha kampaina mak unidade nasional, estabilidade, dezenvolvimentu social no seluk tan.

Iha fatin hanesan, Koordenador kampaina Distritu Liquica, Vicente da Conceicão ‘Rai-Los’ hatete katak ho esperensia nebee durante tempu rezistensia hodi hakuak povu hotu, nia fiar katak CNRT halo mudansa tuir povu nia hakarak.

Eis delegadu Fretilin Distritu Liquica, iha kongresu nasional 2006 liu ba nee sai husi partidu Fretilin laos tanba la gosta, maibe tanba lideransa nebee kaer partidu nee la kondus ho militante nia hakarak. Neduni Rai-Los buka dalan hodi salva Fretilin.

“Hau nunka sai traidor penghianat ba Fretilin, maibe hau tama CNRT atu bele iha mudansa iha Fretilin laran. tantu, hau fiar katak dalan ida atu hadia no salva Fretilin mak CNRT. “ Railos hateten.

Nudar koordenador kampaina Distritu Liquisa, Rai-Los fiar katak CNRT sei hetan votus maioria iha Liquisa. Ida nee, hatudu tiha ona liu husi eleisaun Prezidensial. Jose Ramos Horta nebee hetan apoiu husi partidu CNRT hetan votus maioria iha Liquisa. dd

Sem comentários: