La Kaer Poder Fretilin Manifesta Frustrasaun

Edition: 30 June 2008

DILI – Deputadu Bankada Partidu Demokratiku (PD) Parlamentu Nasional Rui Meneses, konsidera deklarasaun politika Fretilin nia nee hanesan manifesta frustasaun politika tanba la kaer poder ou ukun. Ba Fretilin poder importante liu duke lori povu ba moris diak. Deputadu nee mos dehan ba Fretilin povu ba sira hanesan instrumentu deit atu sira sae, hanesan sae kuda hodi atinzi fali poder nebee sira lakon ona liu husi elisaun zeral foin dadauk nee, tanba povu la fo poder absoluta ba Fretilin atu ukun no kaer poder. Ba Rui no AMP la konsidera ona Francisco Xavier Amaral hanesan opozisaun, tanba Xavier la iha poder ona atu manda deputadu ASDT iha Parlamentu Nasional. Ate agora deputadu ASDT sei metin nafatin ho Aliansa Maioria Parlamentar (AMP). "Saida mak Xavier ho Fretilin koalia liu husi deskursu oin oin simplesmente hatudu sira nian frustasaun deit, tanba la kaer poder. Tanba nee sira halo manipulasaun opiniaun oin oin hodi kria deit instabilidade iha nasaun ida nee. Ba Fretilin no Xavier, unidade no estabilidade laos sai prioridade ida, maibe povu oras nee la beik ona, tanba nee povu sei konfia nafatin governu AMP nian governasaun. Rui Meneses mos dehan, governu AMP hatudu ona nian servisu, resolve dadauk ona problemas IDPS, Petisionariu, Veteranus, problema sira nee rasik uluk governu Fretilin mak husik hela, la konsege rezolve, tanba imkapasidade governu Fretilin nian. "Husik Fretilin lamenta liu husi frustasaun hodi manipula opiniaun publika atu atinze poder, ami AMP servisu nafatin ba interese povu nian diak. Fretilin lakon nia kredibilidade iha governasaun, tanba tuir relatoriu MCC hatudu katak korupsaun makass iha tempu Fretilin ukun," dehan fontes nee tan. Fretilin ho Xavier tauk, tanba tuir fontes nebee besik iha AMP katak Governu AMP komesa hadia ona vida povu, liu husi programa reintegrasaun IDPS, selu pensaun no halo uma ba veteranus no iha tempu badak governu AMP sei selu pensaun ba ferik ho katuas sira hamutuk rihun 60 resin. Servisu Fretilin nian durante tinan 5 mak fo oferta ba veteranus liu husi liafuan oin oin " veteranus fuuk la fase, fahi krekas no kaisa kaixoti" maibe AMP hakarak servi ba povu nian diak liu husi programa integradu hodi servi diak liu povu nian diak. Lui husi programa AMP, komesa fahe trator ba povu sira nebee dedika aan hanesan agrikultor no AMP sei fahe trator hanutuk rihun 2 (2.000) ba povu sira nebee hela iha distritu, potensial atu produs foos no batar. Tuir fonte nee mos dehan, AMP mos fo kareta luxu no osan ba avo Xavier atu goza, maske avo hakilar povu sei moris mukit, maibe avo rasik simu no sae kareta luxu sirkula iha povu nia klaran nebee avo Xavier rasik dehan povu kiak, maibe la moe sai kareta luxu iha povu kiak nian klaran. Avo ho Fretilin dehan governu nee naokten, maibe sira la berani hatudu faktu dan dadus. Sira simplesmente hakilar deit iha dalan dalan maibe sira la berani lori naoktenm ba tribunal. Nee hatudu frakeza Fretilin no Avo nian, tanba sira uluk ukun mos fraku kedas ona hodi husik povu moris iha nakukun laran. "Halo uma mutin boot iha Ossu neba kala lamas osan husi nebee karik? Maibe ita bele deskonfia keta kaer governu tinan 5 liu ba nee, hodi aproveita sulan osan ruma hodi halo uma nebaa karik," dehan fontes nee. . Fontes nee mos dehan lalika mehi atu halo elisaun antisipada, maske Marii Alkatiri hakilar iha mundu tomak elisaun antisipada sei la mosu. Husu ba Alkatiri atu hakilar tan iha lalehan no infernu hodi bolu diabu sira apoiu ba Marii Alkatiri nia mehi. "Elisaun antisipada sei la mosu, tanba situasaun sei normal hela,’ dehan Vice Prezidente PN Maria Paixao iha Atauro foin lalais nee. lio