quinta-feira, 3 de julho de 2008

2.687 Familia Sai, Kampu IDP’s 16 Taka

Edition: 03 July 2008

DILI – Iha tinan nee nia laran, governu AMP lori fila ona Internal Displace Person’s (IDP’s) hamutuk 2.687 familia mak husik ona kampu IDP’s 16.
"2.687 xefi familia ho ema total hamutuk rihun 20 resin fila ona no too agora kampu IDP’s 16 taka ona," dehan Ministra Sosial no Solidaridade Maria Domingas Fernandes Alves ‘Micato’ ba STL iha uma fukun PN hafoin partisipa debate orsamentu rektifikativu, Kurata (2/7).
Kampu IDP’s boot nebee too agora seidauk taka, mak Aeroportu, Metinaro, Dom Bosco, Obrigado Barrak’s no kampu sira seluk kikuan-kikuan nebee espalha iha Dili laran.
Tuir planu nebee trasa ona, fim fulan Julhu, IDP’s Aeroportu sei fila hikas ba ida-idak nia uma. No mos, kalendariu nebee Miniteriu Sosial no Solidaridade halo Dezembru la iha ona IDP’s iha Dili laran.
Ministra Domingas hatete, orsamentu nebee governu prepara sei naton atu selu osan rekoperasaun ba refuziadu sira no mos sei aumenta tan oituan iha orsamentu rektifikativu.
Iha fatin hanesan membru Parlamentu nasional bankada Partidu Sosial Demokrata (PSD), Mario Viegas Carrascalão hatete, esforsu nebee mak governu halo hodi lori fila IDP’s ba ida-idak nia uma hanesan susesu boot ba governu.
"Nee susesu boot governu nian, tanba iha segundu governu no terseiru governu anterior la konsege lori fila IDP’s sira. Mesmu nei-neik maibe sertu katak sira fila duni ba uma," nia haktuir.
Romeo da Concecão, IDP’s Obrigado Barrak’s sente kontenti tanba sira bele fila lalais ona ba uma. Basaa, desde krizi 2006 husik hela fatin, agora iha ona naroman atu toba hakmatek iha uma.
Rigoberto Informa ba Horta
Iha parte seluk, Sekertariu Estadu Sosial no Dezastre Naturais (SESDN) Jasinto Rigoberto, Tersa (01/7), halao inkontru ho Primieru Ministru (PM) Xanana Gusmao, hodi informa kona ba lalaok reintegrasaun IDPs ba ida-idak nia bairo.
Hafoin hasoru balu ho PM Xanana iha Palacio do Governo, Rigoberto esplika ba jornalista sira, katak durante prosesu reintegrasaun nee, mosu dezafius barak mak sira infrenta. Mesmu nunee, sira nia parte konsege taka ona kampu IDPs 15.
IDPs nebee durante nee hamahan aan iha Akademia PNTL, Sabado foin lalais, halo ona despidida. Tantu, ba IDPs sira iha Aeroportu nian, komesa Tersa nee halo ona reverifikasaun.
Iha Akademia PNTL, tuir registu iha familia atus ida resin, maibe akomoda mos familia balun nebee mak hela iha liur nebee sira nee mos registu hotu no prontu atu sai hotu. dd/lia

Sem comentários: