Governu La Fiar Monopoliu TT, Kompaina Telekomunikasaun

Edition: 03 July 2008
Governu La Fiar Monopoliu TT, Kompaina Telekomunikasaun 10 Rezista iha MTKI
DILI – Governu iha ona planu atu halo estudu ba politika telekomunikasaun iha Timor, tanba la fiar ona kontratu monopoli husi Timor Telecom (TT).
"Governu fiar liu kontratu kompetisaun atu bele hetan servisu telekomunikasaun nebee diak, baratu no ema hotu iha asesu," dehan Ministra Finansas Emilia Pires ba jornalista sira hafoin partisipa debate orsamentu rektifikativu iha Parlamentu Nasional, Kuarta (2/7).
Politika telekomunikasaun nebee mak governu trasa liu husi estudu konjunta nebee halo husi Ministeriu Infrastruktura no Ministeriu Finansas, prepara draf ida hodi konsulta ho sosiedade sivil, oinsa bele hanoin hamutuk konaba politika komunikasaun iha Timor Leste.
Emilia dehan, bainhira politika nee halo sei iha impaktu ba Timor Telecom nia servisu, tanba Timor Telecom nia kontratu monopoli.
"Harii ona task force no halo negosiasaun oinsa bele muda kontratu Timor Telecom hodi hatama kompaina seluk iha area servisu telekomunikasaun," hatete Pires.
Ministra nee hatutan, faze nee remata bele ona loke odamatan atu kompaina telekomunikasaun husi nasaun seluk tama mai iha Timor hodi investe.
Iha fatin hanesan, Ministru Turismu Komersiu no Industria, Gil Alves hatete, tuir kontratu nebee halo ho Timor Telecom, seidauk bele hatama kompaina seluk atu investe iha area telekomunikasaun, maibe kompania barak ona mak hakarak investe iha area telekomunikasaun.
"Kompaina sanolu resin ona mak rezista," dehan Ministru Gil hodi hatutan, politika governu nian atu implementa politika kompetisaun iha area telekomunikasaun hetan reasaun positivu husi membru Parlamentu Nasional.
Membru Parlamentu Nasional Aderito Hugo da Costa hatete, importante liu tenki loke kompetisaun iha area telekomunikasaun, nunee kompaina Timor Telecom la bele monopli folin tuir nia gostu deit. dd