Governu Hasai $392.390,00 Selu Veteranus Distritu 7

Edition: 17 July 2008

DILI – Nasaun ne’ebe bo’ot no diak, sei la haluha valor haroi sira nian. Ne’e mak oras ne’e hatudu husi estadu Timor Leste, liu husi IV Governu Konstitusional, ne’ebe lidera husi Primeiru Ministru (PM) Kay Rala Xanana Gusmao. Governu, liu husi Ministeiru Solidariedade Sosial (MSS) hahuu ho pagamentu ba veteranus sira ne’ebe fo aan tomak luta ba libertasaun nasional.
MSS hola planu hahuu halo pagamentu simbolikamente ba veteranus sira iha distritu 7. Pagamentu ba distritu 7 ne’e fahe ba fatin tolu; Ida, konsentra iha Distritu Ainaro ne’ebe sei kobre selu veteranus sira husi Distritu Aileu no Manufahi.
Rua, konsentra iha Baucau, ne’ebe sei kobre veteranus sira husi Distritu Lautem no Viqueuque no treseiru, konsentra iha Ermera hodi toma konta mos veteranus sira iha Distritu Liquica.
Total orsamentu ne’ebe atu selu ba Veteranus distritu 7 hamutuk $392.390,00.
Ba distritu sira ne’ebe seidauk halo pagamentu, MSS iha planu sei lao hotu iha tempu badak.
“Ami sei tama too distritu 13 hotu. Agora ami hahu uluk ho distritu 7,”dehan Sekertario Estadu Asuntu Antigo Kombatentes da Libertasaun Nasional Marito Nicolao dos Reis ba jornalista iha nia servisu fatin, Kaikolia, Dili, Segunda (14/7).
Pagamentu ne’e, dehan Marito Reis, halao ba veteranus sira ne’ebe nia dokumentu kompletu ona. Osan ne’e selu ba fulan 6 nian, hahu husi Janariu too Julhu.
Pagamentu ne’e MSS fo veteranus sira ba simu iha Banco Nacional Ultramarino (BNU) distritu nian. Ba distritu ne’ebe la iha asesu BNU, halao pagamentu iha Administrador Distritu no funsionairu BNU maka selu dereitamente. Pagamentu simboliku ne’e hahu iha Tersa (15/7) horseik.
Iha orariu ba Distritu Baucau, Marito Reis maka ba selu, iha Ainaro Prezidenti Homenajem Virgilio Smith no iha Ermera hola direita husi Ministra MSS Maria Domingas Alves “Micato”.
Marito Reis apela ba veteranus ne’ebe mak naran seidauk iha atu lalika laran susar, tanba dokumentus maka seidauk kompletu.
“Dadus ou dokumentus kompletu hotu ona, ami sei selu. Nee imi nia direitu,” Marito Reis dehan tenik.
Veteranus ne’ebe simu husi Distritu Aileu iha nain 5, Ainaro (24), Baucau (34), Ermera (4), Lautem (69), Liquisa (8), Manufahi (20) no Distritu Viqueque iha ema nain 29.
Iha fatin seluk Venteranus Faustino do Santos, atual membru PN husi bankada UNDERTIM hatete, ho pagamentu ba veteranus sira ne’e hatudu katak estadu valioriza nia haroi sira. Maibe Veteranus husi Distritu Lautem ne’e mos kestiona kona ba dadus ne’ebe maka sei presiza hadia, nune’e mos ba lei lei Antigo Kombantentes nee rasik sei diskrimina resistensia sira.
Pensaun ho durasaun tinan 8 too tinan 14 ne’e, tuir nia, sei hamosu problemas, tanba hare ba idade veteranus nian komesa katuas ona no simu osan iha tinan badak deit.
“Ba oin ami sei hatoo proposta lei iha 2009 atu nunee hadia valor veteranus sira,” nia hatete.
Tempu To’o Ona
Iha parte seluk, Mnistra Solidariedade Sosial Mari Domingas Alves “Micato” liu husi konfernesia imprensa, horseik iha nia servisu fatin, deklara aberta katak komesa horseik veteranus ne’ebe nia dokumentu kompletu on abele simu ona nia direitu.
Nia hatete, to’o ona tempu MSS liu husi Sekretariu Estadu Asuntus Veteranus no Antigus Kombatantes ba Libertasaun Nasional no Komisaun Homenagen fo subsidi ba veteranus sira, hafoin komisaun ne’e rasik halo rejistrasaun.
Husi levantamentu dadus ne’ebe komisaun halo ona hetan benefisiarius 12.538 ho diskrisaun hanesan pensaun special substintensia ba kauza idosos katak sira nebe partisipa iha luta entre tinan 8-14 hamutuk ema nain 277 benefisiarius, pensaun ba special substitensia por inkapasidade de trabalho katak sira ne’ebe la bele halo servisu tanba kauza husi luta entre tinan 8-14 hamutuk ema nain 120.
Pensaun special ba reforma katak ema sira ne’ebe partisipa iha luta entre tinan 15-24 hamutuk ema 234 benefisiarius no ikus liu pensaun ba sobrevivensia ba erderod de martires katak sira ne’ebe partisipa iha luta maibe sira mate hamutuk ema 11.907.
Prezidente Komisaun Homenagen, Virgilio Smith husu ba Veteranus no Antigu Kombatantes Libertasaun Nasional sira ne’ebe seidauk simu no ba sira ne’ebe hatam ona sira nia rekerimentu atu pasiensia, tanba Komisaun Homenajen no Ministeriu Solidaridade Sosial sei prosesa nafatin to’o sira hetan sira nia direitu.
Nia mos husu ba benefisiarius sira ne’ebe seidauk hatama rekerimentu atu hatama lalais iha sub distritu sira para bele hetan informasaun ne’ebe diak no bele halo ona prosesu hanesan hodi selu uluk fulan 6 nia laran.
Benefisiarius balun ne’ebe dokumentus seidauk kompletu ou seidauk prenxe criteria, bele halo kompletu tuir informasaun ne’ebe hasai ona iha komunikadu da imprensa ne’ebe fahe ba disritu, sub distritu no suku ida-idak. bre/lia