Kareta Estadu 109 Lakon, Governu Sei Keixa ba Inspektorat Jeral

DILI- Ministra Planu no Financas, Emilia Pires hatete katak problema prosesu ba kazu asset kareta estadu nebee lakon hamutuk 109 iha governu anterior nian, agora dadaun sei iha prosesu investigasaun, maibe kuandu la hetan, governu sei hatoo keixa ba Inspektorat Jeral Republika atu investiga klean liu tan.
Tuir Emilia katak wainhira governu AMP nee simu knar, tenki iha relatoriu ida konaba asset estadu nian konaba kareta no buat sel-seluk tan.
"Hau husu ba staff sira, nebee responsabiliza ba servisu nee fo relatoriu nee maka hau mos fo sai tiha ona. Nebee governu anterior iha kareta no kareta balu aat, balu lakon no kareta balu mos la rejistu," deklara Emilia iha audensia públiku ho membru PN, Kuarta (02/7).
Ministra Emilia mos fo sai katak nia nunka dun ema ruma, maibe nia fo sai deit konaba relatoriu nebee maka tama. Nebee agora dadaun nia staff sira fo relatoriu nee mai, nebee nia hakarak liu tan informasaun ho nunee sira mos ba buka atu investiga liu tan kazu nee.
Kuandu kareta nee maka lakon duni, haktuir Emilia, entaun pozisaun governu maka tenki hatoo keixa ba Inspektorat Jeral ho instituisaun nebee maka relevante atu halao investigasaun.
"Agora dadaun hau nian staff sira halo hela relatoriu mai hau. Tanba normalmente estadu nia asset ita tenki buka laos atu husik deit," Emilia reforsa.
Bazeia ba informasuan husi Direisaun Nasional do Patrimonia, katak kareta estadu total 2642 nee, la inklui ho motorizada no kareta nebee diak maka 1736, kareta aat 707, kareta nebee seidauk hetan ou lakon 109, kareta nebee seidauk rejistu 21, nom os kareta 69 iha kazu laran.
Konaba motorizadas, hatete Emilia, iha 3383, nebee ninia klasifikasuan iha kondisaun diak, 2354, kondisaun aat 419, seidauk hetan ou lakon 97, seidauk rejistu 130 no motorizada nebee iha kazu nian laran 383.
Antes nee, Direktor Interino Diresaun Nasional do Partimonio de Estadu, Januario Gama hatete, kareta nebee mak governu anterior ou eis membru governu balu sei uza la tama iha klasifikasaun lakon maibe kareta nee to agora sira seidauk fo fila mai governu aktual ou estadu.
Januario esplika, husi dadus nee direisaun nee halo klasifika ba kondisaun karreta diak, karreta nebee seidauk rejistu, karreta nebee lakon, no karreta nebee iha kazu nia laran. Tanba númeru karreta nee iha Timor nebee estadu nian maka hamtuk 2642 nee la inklui ho motorizada. Husi ida nee maka direisuan nee halo klasifikasaun ida-idak.
Wainhira husu konaba sansaun ba ema nebee halakon karreta ou halo aat karreta, Januario hatán katak konaba sansaun teknikalmente direisuan nee laiha kompetensia legal ida atu bele fo sansaun, portantu ita koalia konaba kompetensia legal instituisaun balu maka iha kompetensia liu.
Iha parte seluk wainhira halo klarifikasuan ba eis Primieru Ministru anterior, Estanislau Aleixo da Silva rekuinese katak karreta barak mak iha tinan 2006 ema naok, balu ema lori halai no balu sunu.
Tuir Estanislau katak buat ida rejista asset nee mos laos fasil, altura nee halo hela levantasaun hodi halo asseta governu nian, no parte ministériu financas anterior mak hatene liu konaba nee. arm