quinta-feira, 25 de outubro de 2007

Eskuta Telefonika, TR ho PDHJ Tenki Investiga TT

Edition: 23 October 2007
DILI – Parlamentu Nasional husu Tribunal Rekursu (TR) ho Provedoria Direitus Humanus no Justisa (PDHJ atu halo investigasaun klean ba Timor Telekom (TT).

Pedidu PN nian nee, relasiona ho kazu eskuta telefonika konversa entre eis deputadu Leandro Isaac ho Prokurador Jeral Longuinhos Monteiro no eis Xefi Gabineti Prezidenti Republika atul Sekertariu Estadu Konselhu Ministru,Hermenegildo “Agio” Pereira hodi habelar krizi rai laran .

“Husu ba meza parlamentu nasional atu rekomenda kazu nee ba TR ho PDHJ hodi halo investigasaun para defende ema nia direitu no ema nia privasidade. Nunee, ita bele hatene se mak sala no se mak loos,” dehan membru PN bankada Congressu Nasional Rekonstruksaun Timor Leste (CNRT) Arão Noel Amaral liu husi sesaun pelnaria PN, Segunda (22/10).

Tuir nia haree katak bele mos TT hanesan instituisaun la halo eskuta telefonika, maibe ema iha laran mak halo manobra. Neduni husu TT labele taka problema nee

Nia senti la satisfeitu ho deklarasaun nebee TT hasai ba publiku katak halo deputadu sira halo akuzasaun falsu konaba gravasaun eskuta telefonika.

Membru bankada CNRT Fernanda Lay nebee mos nudar eis direitora telekomunikasaun tempu Indonesia hatete katak konverse liu husi fixu telefonika nee kompanha TT mak bele eskuta no grava. Neduni, nia konsidera pergozu bainhira ema hotu bele halo gravasaun. Tuir lolos Polisia no tribunal mak bele fo autorizasaun hodi halo gravasaun ba konverse ema ida nebee atu estraga estabilidade nasaun nian.

Membru Parlamentu Nasional husi bankada CNRT, Aderito Hugo da Costa diskunfia TT involve iha konpirasaun, tanba halo gravasaun laiha koinesemntu.

Tuir nia, hahalok nee krimi, tanba nee husu ba orgaum kompententi atu halo invesgasaun klean ba TT.

“Hau konsidera gravasaun distribusaun ida nee hanesasan skandal nasional, nebee involve konspirasaun nivel as. TT hanesan operador uniku, primenru hau diskunfia nia involve iha nee,” Aderito Hugo da Costa hatete ba STL iha PN, horseik.

Hanesan nasaun nebee tau lei as tebes, Hugo prevere kazu nee tenki lori ba prosesu seriu, intrega prosesu investigasaun ba see deit mak involeve, tanba nasaun nee iha dignidade soberania. “Hau nia intervensaun iha primeiru dia, hau hatete kedas katak kualidade gravasaun nebee preveitu teb-tebes halo hau diskunfia kedas katak operador TT mak halo buat ida nee, hau diskunfia laos kondena TT mak involve,” Hugo hateten.

Liu husi plenaria PN, Segunda (15/10), bankada Fretilin halo ‘keisa’ konaba konversa telefonika entre Longuinhos Monteiro, Procurador Geral Republica, ho Leandro Isac, nebe envolve mos Hermenegildo Pereira, Xefi Gabinete Presidente da Republica, no atual Secretario Estado Konselho Ministros.

Fretilin liu husi deklarasaun politika husu ba orgaun soberanu li-liu Prezidenti Republika atu hasai Longuinhos Monteiro husi kargu Prokurador Jeral, tanba deskonfia halao konspirasaun politika hodi habelar krizi iha tinan 2006.

Hatan ba nee, Prokurador Jeral da Republika, Longuinhos Monteiro deklara katak keisa nebee Fretilin halo konaba konversa telefonika entre nia halo ho Leandro Isaac, nebee envolve mos Hermenigildo Pereira, nudar defamasaun nebee Fretilin halo. No nia sei reklama tuir lei laos politika.

Iha parte seluk Prezidenti Republika, Jose Ramos Horta mos kunsidera katak konversa telefonika neebe preokupa husi bankada Fretilin konaba involvimentu Prokurado Jeral Longuinhos Monteiro neebe halo ho Leandro Isaac no Hermenegildo Pereira, see TT mak involve iha laran nee grave teb-tebes.

Kona ba polemika neebe refere, Ramos Horta ejiji iha investigasaun hodi hatene se mak eskuta konversa telefonika nebee involve Prokurador Jeral da Republika Longuinhos Monteiro.

Prokurador Jeral, Longuinhos mos isplika katak konaba telefonika nee nee laiha lei ida maka bandu nia nudar Prokurador Jeral hodi halo konfersa privadu ho see deit no konaba saida deit. dd/car

Sem comentários: