terça-feira, 23 de outubro de 2007

Mario Husu Alkatiri Labele Garganta

DILI – Membru Parlamentu Nasional (PN) Bankada PSD, Mario Viegas Carrascalão husu ba deputadu Marii Alkatiri atu hatudu provas hodi lori ba tribunal para labele gargante deit hodi akuza Xanana halo konspirasaun hatuun governu Fretilin iha tinan 2006.

Fretilin, katak Mario, iha fundementu atu lori kazu nee ba tribunal, bainhira iha provas katak Xanana involve iha konspirasaun hatuun governu Fretilin. “Hatete konspirasaun tenki aprezenta provas. Se mak halo, bainhira, iha nebee, liu meius saida mak halo konspirasaun nee. La bele koalia iha ibun deit, tanba tribunal mak deside konstitusional ka inkonstitusional, “ dehan Mario Viegas ba jornalista iha PN, Dili, Kinta (18/10).

Mario dehan, governu Fretilin monu iha 2006 liu ba tanba governasaun Fretilin laduun diak. Nee mak hamosu deskontentamentu husi povu hodi hatuun governu nee, laos konspirasaun.

“Ita haree durante tinan 4, governu Alkatiri haree deit ba sira nia interese. Nee mak hamosu krizi no hamonu governu Fretilin, tan nee la bele duun deit, maibe tenki haree ba faktus,” nia hatete.

Tuir nia, se governu Fretilin mak governa diak talves bele konprova saida mak lideransa Fretilin deklara katak Fretilin sei governa rai nee too tinan 50 ka 100. Maibe, tanba governa ladiak, iha eleisaun liu ba povu kastigu Fretilin hodi la hili ona Fretilin atu manan absoluta hanesan tinan lima liu ba. Tan nee iha eleisaun liu ba Fretilin hetan deit 29% hatudu katak Fretilin lakon ona konfiansa husi povu, no lakon nia poder.

“Uluk sira hetan 50%, agora hetan deit 29%, nee povu mak hatuun duni sira laos ema seluk,” nia komenta.

Alkatiri hatete ona katak sei halo sasan hotu-hotu atu trava governu AMP liu husi programa. Katak governu AMP sei la bele implementa nia programa hodi diak atu nunee bele alkansa ona ba eleisaun antisipa.

Pesoalmente, Mario la fiar governasaun Fretilin monu tanba konspirasaun. “Se karik haree konspirasaun, antes nee lalika tuir eleisoens, ba deit tribunal too konspirasaun nee rezolve tiha, semak sala hataan iha tribunal, hadia hotu ona mak halo eleisaun. Tanba, bainhira eleisaun halo tiha lakon dehan konspirasaun,” nia tenik.

Mario komenta katak Prezidenti Republika konsidera Alkatiri hakarak buka dalan oi-oin hodi hamonu governu AMP, hodi nunee bele hakat lalais ba eleisaun antisipada. “Deklarasaun Alkatiri laos izoladu husi buat nebee sira planeadu tiha ona. Hanesan iha PN buat aat mos sira (Fretilin) diskuti naruk ba bebeik, sira soe ba mai atu halo rai nee la lao. Buat nebee Fretilin halo los duni laos ho violensia fiziku, maibe ho violensia politika,” nia dehan.

Antes nee, Sekretariu Jeral partidu Fretilin, Marii Alkatiri deskonfia eis Prezidenti Republika Xanana Gusmão involve iha konspirasaun hodi hatuun governu Fretilin iha tinan 2006.

Deskonfiansa nee mosu husi eis Primeiru Ministru nebee hatuun iha krizi 2006 nia laran, tanba involvimentu eis xefi gabineti Prezidensia Republika Hermengildo ‘Agio’ Pereira iha konversesaun nebee Fretilin hetan grava entre Prokurador Jeral Longuinhos Monteiro no Leandro Isaac liu husi telefonika konaba deklarasaun husi Alfredo Reinado Alves. dd

Sem comentários: