Horta: “Hau Nia Obrigasaun Atende Povu”

Edition: 23 October 2007
DILI - Prezidente Republika (PR), Jose Ramos Horta deklara ba povu Fatuberliu no Natarbora katak nudar PR nia knar primeiru maka atu atende povu kiik no kiak sira.

PR Horta iha Kinta no Sesta, semana kotuk, halao vizita trabalho ba Sub Distritu Fatuberliu, Distritu Manufahi, no Sub Distritu Natarbora, Distritu Manatuto.

Iha vizita loron rua nee, Xefe Estadu akompanha husi Ambaxador Korea do Soul mai Timor-Leste, Kim Soo Il, Konselhero Ambaxador Portugal iha Timor-Leste, Xefe Gabinete Prezidensial, Jose Manuel Turquel de Jesus no estaff Prezidensial balun, diretores husi instituisoes relevantes, no mos autoredades lokal iha area neebe refere.

Tuir informasaun nebee STL hetan asesu iha gabinete informasaun PR, Segunda (22/10) katak iha PR Horta nia vizita Sub Distritu Fatuberliu, Prezidente no ninia komitivas uza oportunidade nee hodi halao observasaun ba eskola Premaria no Pre-Sekundaria iha area neeba. Alende nee, Xefe Estadu mos halao observasaun ba grupu agrikultor iha aldeia Kaikasa, Lagoa Welenas, Konventu Madre Franciskanu-Fatuberliu, no sentru EDTL iha area neba.

Atu hatene liu-tan kona-ba prekupasoes no difikuldades povu sira nian iha fatin nee, Xefe Estadu mos halao dialogu ho autoredades no populasaun sub distritu nee nian. Iha dialogu nee, populasaun sira neebe hela besik mota Kaikasa-Fatuberliu mos kestiona konaba sira nia problema neebe sempre hetan desastre inudasaun husi mota wainhira udan tun. Hatan ba prekupasoes hirak nee, Prezidente hateten katak nudar Xefe Estadu, nia sei hatoo povu sira nia lian ba governu hodi nunee governu bele tau matan lalais.

Laureadu Nobel da Paz 1996 nee mos hatoo ninia agradesementu ba populasaun sira neebe simu nia ho ninia komitivas ho laran haksolok. Prezidente mos hateten katak vizita ida nee ho objetivu atu hare difikuldades no rona diretamente prekupasoes populasaun sira nian iha baze.

“Nudar Prezidente Republika, hau nia obrigasaun permeiru mak ba povu deit,” hateten Horta ba populasaun sira iha durante dialogu.

Depois ramata ninia vizita iha sub distritu Fatuberliu, Prezidente Republika ho ninia komitivas tomak kontinua halao viazen ba sub distritu Natarbora, distritu Manatuto hodi halao observasaun ba eskola tekniku agrikultura iha area nee.

Iha vizita nee, Prezidente neebe akompanha husi diretor eskola neebe refere hetan oportunidade hodi ba hare area eskola nee nian. Depois de halao observasaun ba area eskola nee nian, Xefe do Estadu halao mos dialogu ho profesores, alumnus, autoredades lokal, no populasaun lokal iha area nee.

Hanesan mos komunidade iha sub distritu Fatuberliu, autoredades lokal no komunidade sira iha sub distritu Natarbora mos hatoo sira nia ejizensia no difikuldades ba Xefe do Estadu. Difikuldades hirak nee mak hanesan : falta be mos, fasilidade eskola nian, fasilidade saude, elektresidade, estrada no seluk tan.

Hatan ba kistaun hirak nee, Prezidente esplika katak atu halao programa redusaun poneeza iha nasaun nee, Prezidensial da Republika estabelese ona ekipa Task Force ida hodi atende difikuldades populasaun sira nian. “Luta kontra poneeza hanesan luta ba paz no sai nudar kazu nasional,” esplika Dr Ramos-Horta ba partisipantes dialogu iha area nee.

Hafoin halao observasaun iha area eskola tekniku agrikultura iha area neebe refere, Prezidente Republika hateten “ Eskola ida nee sai hanesan eskola ida neebe di’ak tebes e estadu tomak rekonhese ona eskola nee, neduni mai ita servisu hamutuk hodi halo eskola nee sai modelu neebe di’ak iha rai ida nee”.

Alende halao dialogu no observasaun, Prezidente Republika no komitivas tomak uza mos oportunidade iha vizita nee hodi fo ajudus balun hanesan komputadores, roupas, no ekipamentus desportu ba eskola, joventude, no madre sira iha sub distritu rua nee. bre