PN Husu Investiga Timor Telecom*Diskunfia Halo Konspirasaun Politika

Edition: 16 October 2007
PN Husu Investiga Timor Telecom*Diskunfia Halo Konspirasaun Politika
DILI – Relasiona gravasaun konversesaun liu husi telefonika entre Prokurador Jeral Longuinhos Monteiro, Leandro Izaac no Hermengildo Pereira konaba kazu Alfredo Reinado nian, nebee mosu iha publiku nia leet, Parlamentu Nasional husu atu halo investigasaun ba kompanha Timor Telecom (TT) tanba deskonfia involve konspirasaun politika.

Membru PN husu atu halao investigasaun hodi hatene klaru konaba gravasaun nebee iha tanba, kompanha Timor Telecom mak operador telephone uniku iha Timor. Neduni, distribuisaun gravasaun nee hatudu ba povu katak kompanha nee laiha kapasidade.

“Kompanha nee mai atu buka interese ba nia aan deit. Nee hatudu katak TT involve iha konspirasaun ida. Estatutu profesional nebee nia iha atu benevisia deit semak fo estatutu nee ba nia,” dehan membru bankada Kongressu Nasional Rekonstruksaun Timor Leste (CNRT) Aderito Hugo da Costa liu husi sesaun plenaria, Segunda (15/10).

TT tenki mai hatete lolos saida mak akontese. Se deit mak involve iha skandal konspirasaun boot ida. Failansu nee, hatudu momos ba politika nain sira katak estatutu especial nee tenki haree labele fo nar-naran deit. Tenki haree kompanha nee professional duni ka lae. “TT tenki mai klarifika buat nee iha PN katak gravasaun nee mai husi nebee.”

Iha okaziaun nee, membru bankada CNRT Fernanda Lay no eis direitora telekomunikasaun tempu Indonesia nebee iha esperensia konaba telekomunikasaun nian hatete katak konverse liu husi fixu telefonika nee kompanha Timor Telecom mak bele adapta no grava.

Neduni, nia konsidera pergozu bainhira ema hotu bele halo gravasaun tanba, tuir lolos Polisia no tribunal mak bele fo autorizasaun hodi halo gravasaun ba konverse ema ida nebee atu estraga estabilidade nasaun nian. “Empreza publika bele halo gravasaun, nee la proteze kliente nia segredu. Nunee, hahalok nee pior liu governasaun Indonesia.”

Nunee, mos membru bankada partidu social demokrata (PSD) Fernando Gusmão hatete, iha konstituisaun artigu 7 pontu 1 hatete katak “povu halao nia kbit politiku liu husi sufrajiu universal livre, direitu, sekretu no periodiku, no liu husi forma seluk tan nebee hakerek ona iha lei inan”. Neduni, se deit labele interompe estraga no ezekuta ema nia korespondensia.

Assuntu ruma nebee ema ida atu koalia semak iha direitu atu halo ligasaun telefonika mak instiruisaun nebee mak ezekuta ligasaun telefonika.

Hanesan mos membru bankada Partidu Demokratiku (PD) Vital dos Santos husu ba PN atu halo investigasaun konaba gravasaun nee. Karik TT mesak mak bele halo gravasaun nee ka iha mos akordu ba sponsor TT seluk tanba, lalaok nee parte husi krimi ka politika.

Politkamente TT tenki responsabiliza hahalok nee ba PN no povu. Nunee mos, legalmente TT sei liu husi investigasaun profundu mak hatene katak TT mak sengaja halo atu fo ba partidu balu ba nia interese rasik hodi viola ona konsumidor rasik.

TT tenki simu nia konsikuensia, maibe PN mos labele husik TT atu kontinua nia hahalok hanesan nee. Tanba, ema tauk atu koalia tanba TT bele grava no distribui ba ema hotu no grupu sei deit. dd