segunda-feira, 28 de abril de 2008

Timor: Marcelo Caitano Iha KOK Nia liman, Desmente Halai Ba Atambua

Edition: 28 April 2008

DILI - Marcelo Caitano ema nebee deskonfia forte tiru Prezidenti Republika Jose Ramos Horta iha atentadu 11 Febreiru liu ba oras nee dadauk iha ona Komando operasaun konjuntu (KOK) nia liman. Tuir informasaun nebee STL hetan horikalan liu husi via telephone Marcelo Caitano hatete, nia oras nee hamotuk ona ho Gastao Salsinha ho nia maluk sira seluk iha Lauala Ermera, hodi kopera no estadu.

Caitano desmente buatus bar-barak dehan nia halai ona ba estranjeiru ka Indonesia. “Nee la los, hau la halai ba esrtranjeiru hanesan saida maka sira dehan, hau iha Timor Leste hodi akompainha hela evolusaun konaba ami nia situasaun iha rai laran,” nia realsa.

Maske nia rekuza atu fo informasaun klean liu konaba nia involvimentu iha 11 Febreiru liu ba, maibe nia sente tebes ho asidente nebee konsege hakanek PR Horta nee. “Konaba kazu nee hau la bele fo komentariu klean ba STL, tanba sigredu estadu nian. Buat hotu hau sei rai iha meja leten foin hatene, se mak sala no los no sala,” nia hatete.

Konaba akuzazaun PR Horta ba nia nudar autor tiru nia iha atentadu 11 Febreiru, Marcelo rekuza hodi fo komentariu. “Hau lakohi responde ida nee, mas hau prontu atu hatan iha justisa,” nia realsa.

Marcelo seidauk hatene se maka atu sai hanesan nia defensor atu defende nia iha tribunal, tanba problema nee hotu sei intrega ba Salsinha nudar sira lider.

Ba diariu ida nee nia konfesa katak nia foin mai husi Suai, akompanha husi asesosr Prezidenti Republika nian, no segundu Sarjentu Alende, nia hamotuk ho Gastao maizoumenus tuku sia horikalan. Nia salienta, viajen sira nia atraza to iha Salsinha nia uma, tanba kareta at no gozolina maran. “Oras nee hau hamotuk ho Tanenti Koronel Maunana no forsa KOK tomak.
Maske Marcelo akuzadu iha atentadu 11 Febreiru, nia konfesa katak ni livre hanesan sidadaun komum no laos hanesan prezu. “Ami sei livre hanesan ema bain-bain, laos prezu,” nia hatete.

Responde konaba bainhira sira atu tun mai Dili, Marcelo dehan nia seidauk hatene serteza, tanba sei hein nia maluk nain ualu (8) nebee too oras nee seidauk hamotuk ho sira. “Hau la hatene, ohin kalan, aban, ami hamotuk, hafoin tunba Dili.” **

Sem comentários: