La Kleur Tan Kampu IDPs Taka

Edition: 07 March 2008

DILI – Primeiru Ministru Kay Rala Xanana Gusmao afirma katak la kleur tan governu sei taka kampu Internal Displace Persons (IDPs) hotu iha Dili laran.

Xanana lamenta ho atetude deslokadu balu nebee simu tiha ona osan subsidiu husi governu depois fila ba ba kampu deslokadu laos fila ba sira nia hela fatin. “Hau hakarak fo hatene ba imi katak, iha familia balun simu tiha osan husi governu, fila fali ba iha fatin deslokadus, ida nee iha ona disponivel ba ami katak, sira bele fila fali, nee la iha buat ida, maibe hanesan fofoun dehan katak komitmentu governu nian atu rezolve problema deslokadu nian, tan nee buka atu rezolve dadauk, tan nee IDPs la bele hanoin atu bosok governu, katak sira simu tiha osan fila fali deit ba IDPs,” Xanana hatete.

Relasiona ho atetudi hirak nee tuir Xanana katak atu kleur ka lalais, kampu IDPs sei taka, tanba iha loron hirak liu ba governu hasoru malu IDPs, sira hatete katak, problema Alfredo ho Petisionarius nian rezolve tiha maka prontu atu fila, tan nee laiha razaun tan atu ba toba nafatin iha IDPs.

“Problema foin dadauk mosu, balun dehan katak ba simu tiha osan husi governu fila fali deit ba kampu IDPs, nee hau sei haree,” katak xefi governu nee.

Xanana laiha apelo ba petisionarius sira, tanba problema nebee maka IDPs sira tau iha problema maka, ijiji governu ho nia autoridade sira atu fo prioridade ba problema seguransa liu-liu rezolve lalais problema Alfredo ho petisionarios sira nian. Governu tenta rezolve problema sira ho modo nebe iha, tan nee depois hetan ajudu husi governu laiha tan razaun atu ba toba bebeik iha IDPs hodi hein tan ajudu segundu.

Iha oportunidade nee, Xanana informa katak inkontru semanal nebee nia halao ho Prezidente Republika, koalia mos kona ba Prezidente Republika atu hasai hanoin no desizaun balu, liu-liu iha Kinta feira santa, Sesta feira santa, no Sabadu feira santo iha loron koresma nee. PR mos tuir nia sei hasai apelu relasaun ho loron boot sira nee.

Okaziaun nee Xanana husu ba jovens sira iha rai laran atu la bele aproveita tempu hirak nee hodi hemu lanu no provoka malu, basaa Kinta feira santa, Sesta feira Santa, no Sabadu santo, sei la iha rekuilero obrigatorio, maibe hot-hotu tenki servisu hamutuk atu kontribui paz no estabilidade nasaun nee nian. bre