Alfredo: UNMIT Laiha Direitu Intervein Problema Internu TL

Edition: 21 January 2008

SUAI — UNMIT laiha direitu atu intervein ba iha problema internu nasaun nee nian, tanba Timor Leste hanesan nasaun soberania ida iha nia lei no modu proprio atu rezolve problema nebee nasaun infrenta.

“UNMIT laiha direitu atu kondena hau nudar ema Timor oan ida, tanba TL nasaun soberanu i demokratiko iha nia lei rasik atu implementa, laos ema internasional sira mai halo lei hodi implementa tuir sira nia maneira,” Eis Komandante Polisia Militar Major Alfredo Reinado Alves hatete lia hirak nee ba jornalista bainhira responde kona ba deklarasaun UNMIT nian nebee sujere Major Alfredo tenki submete ba justisa, iha Kovalima, Kinta(17/1).

Intrega aan ba justisa katak Alfredo laos buat ida defisil maibe, UNMIT mos tenki rekonese erru nebee sira halo kodi hamosu insidenti 25 de Maiu nebee rezulta polisia nain 8 mate iha ministeriu justisa nia oin. “Agora UNMIT tenki esplika ba povu Timor nusa mak akontese. Ba hau intrega aan ba justisa buat fasil boot ida maibe, UNMIT tenki hatene aan atu a responsabiza ba krize politika militar iha rai laran,” nia hatete. Alfredo konsidera justisa nebee lao iha rai laran, hanesan justisa mafiozu basaa ema sira kaer justisa hirak nee autor kriminozu hotu, tan nee bainhira atu halo justisa maka tenki panel independenti hodi halo julgamentu ba autor krize sira.

Nia hatete kapturasaun ba nia laos rezolve ona krize, tanba abut husi krise hirak nee mainanis husi insidenti 28 Abril nebee rezulta trauma ba povu nebee durante tinan 24 moris iha presaun tropas indonesia nian. “Nusa kazu sira nee autor justisa sira haluhan tiha, ida nee tanba nai ulun sira mak halo tan nee labele kaer, nee duni hau ema kiik maka tenki hatan mesmu hau vitima mos iha krize nee,” nia hatete.

Autor krize 2006 katak Alfredo tenki julga liu husi tribunal militar, tanba krime militar, tanba nee presiza harii tribunal militar panel idependenti ida hodi halo julgamentu ba autor krize 2006 nian. Tribunal militar nee tenki lidera husi juiz militar, laos ema sivil. “Hau lakohi ita kahur tun sae hodi kaer inosenti sira ba sulan sein hatene ema sira nee sala ka lae.

Nia sublina katak implementa justisa la signifika estabilidade iha nasaun nee garantia ona. Tan nee problema nee hanesan naha todan ida tau hotu ba Alfredo, maibe presiza hatene katak lei nebee atu aplika validu ba ema hotu inklui UNMIT.

UNMIT katak Alfredo hakarak haree lei hirak nee implementa iha rai laran tenki servisu hamutuk governu no estadu TL hodi estabelese tribunal panel independenti ida hodi julga autor krize 2006 nian. “Hau husu ona ba senior Prezidenti atu kria tribunal panel nee hodi rezolve krize,” nia realsa. Nia sublina kata bainhira kria ona tribunal panel nee tantu nai ulun i ka soldadu, Prezidenti kak PM no se deit nebee deskonfia involve iha krize tenki submete ba investigasaun. Mas kestaun ida nia sei duvidas ho seriedade autor justisa nian atu prosesu autor krize. qui