quarta-feira, 23 de janeiro de 2008

Timor Leste: Xefi Suku Kontenti Ho Jornal Gratuitu

MANUFAHI- Xefi Suku sira iha Distritu Manufahi sente kontenti teb-tebes ho politika governu Aliansa Maioritaria Parlamentar (AMP) nian nebee distribui jornais nasionais sira ba suku-suku iha teritoriu tomak. Ho jornal nebee sira hetan gratuitu bele akompanha informasaun kona ba dezenvolvimentu iha nasaun doben nee.

Xefi suku nudar autoridade lokal presiza tebes atu akompanha dezenvolvimentu nasaun nee nian liu husi informasun. Durante nee xefi suku sira susar teb-tebes atu akompanha situasaun iha rai laran tanba, seidauk hetan asesu informasaun liu husi Jornal, Telvisaun , Radio, no seluk tan, maibe ho jornal tama too suku sira bele akompanha ona evolusaun nasaun nee nian. “Ami iha nee kiak tebes ba informasaun, ho nunee bainhira ema ruma mai lori lia anin ami fiar matak deit, maske realidade la tuir saida maka ema sira nee koalia,” Xefi Suku Letefoho Sub-Distritu Same, Agapito da Costa kasu lia hirak nee ba STL iha Same Manufahi, Segunda (14/1).

Hanesan hot-hotu hatene, iha tinan kotuk liu ba governu AMP halo akordu ida ho direjenti jornais nasional sira nasaun nee liu husi Press Club Timor Leste (PCTL) atu distribui jornal ba xefi suku sira iha teritoriu tomak. Bazeia ba akordu nee iha Janeiru 2008 nee jornais Nasional hanesan Suara Timor Lorosae (STL), Diario Nasional (DN), no Tempu Semanal (TS), komesa sama ain too iha suku hamotuk 442 iha nasaun nee. Xefi suku Agapito fo agradese boot tebes ba governu AMP nebee lidera husi Eis Komandante Falintil Kay Rala Xanana Gusmao nebee halo akordu ho direjenti jornais sira hodi halekar informasaun ba xefi suku no povu iha nasaun nee liu husi Jornal.

“Buat ida nee maka ami hein hela durante nee tanba, durante nee ami langganan ho jornal balun, maibe ho jornal gratuitu nee ami sei para lai,” nia hatete. Nunee mos ho Xefi Suku Dotik Sub-Distritu Alas Franco da Costa Doarte, hatete katak nia parte senti kontenti tanba, Jornal bele tama too iha nia area. Ho nebee sira hetan bele akompanha informasaun iha rai laran, tanba sira nebee hela iha suku susar tebes atu akumpanha informasaun iha rai laran. Jornal nebee hetan tuir Franco sei tau iha sede do Suku, atu nunee kada populasaun nebee hakarak hatene informasaun iha rai laran bele lee, no komunidade mos informasaun liu husi Telivisaun radio. Informasun katak Franco importante teb-tebes ba povu, tanba liu husi informasaun sira bele hatene saida mak governu ka stadu halao iha nasaun doben neeno saida maka ita seidauk bele halao. gus
Edition: 21 January 2008

Sem comentários: