Kondisaun Tratamentu Rogerio, Lucia Husu PN Harii Komisaun ba Malayzia

Edition: 23 November 2007

DILI- Ministra Justisa, Lucia Lobato suzere ona ba Parlamentu Nasional (PN) hodi harii Komisaun ida atu ba Malayzia hodi haree ho matan kondisaun prizeineiru eis Ministru Interior, Rogerio Tiago Lobato.

Ministra Lucia hatoo lia hirak nee ba jornalista hafoin partisipa iha loron Mundial Internasional ba dala 18 iha salaun Delta Nova, Komoro, Kinta (22/11).

Hanesan ema hatene bazeia ba surat keterangan dokter nebee Ministeriu Justisa simu tiha ona nee hatudu eis Ministru Interior, Rogerio ninia kondisaun komesa diak oituan, depois tiha halao operasaun, maibe tuir keterangan dokter Roger presiza rekoopera fali ninia kandisaun ho nunee doutor nebee fo tratamentu atu Rogerio bele hela tan fulan haat iha Malayzia.

Tuir Ministra Lucia katak fulan haat nee komesa iha Agustus to Dezembru mai nee. Tanba doutores sira husu ba goveru para rogerio bele hela tan fulan haat, iha malayasia. Depois tiha nee mak bele hare saida mak bele halo tan ba oin.

“Ho nunee hau suzere ona ba PN, katak sekarik PN hare presiza atu tau liman mos ho nunee haruka komisaun ida nebee kompozisaun komisaun nee bele membrus PN, medikus balu iha laran, no bele mos sosiedade sivil iha laran, para atu hakat tok ba Malayzia hodi hare ho matan saida mak akontese ba Rogerio ninia kondisaun,” husu Lucia.

Komisaun nee, hatutan Lucia para atu hare besik liu Rogerio nia situasuan halo nusa, kondisuan diak ka la diak. “Nebee hau hanoin labele rona deit Ministeriu da Justisa tanba orsida dehan fali bosok. Maibe hau hatoo ona proposta ba PN, no ita hein saida mak PN atu halo ba proposta nebee mak hau hatoo nee,” propoin Lucia.

Responde konaba karik iha penambahan orsamentu ba tratamentus saude Rogerio nian iha Malayzia, Lucia hatan hodi dehan katak konaba orsamentu nee nafatin, no saidauk iha permintaan foun konaba osan.

Antes nee, Ministra Lucia mos hatete katak kuandu kondisaun Rogerio nian komesa diak ona, entaun laiha tan razaun para Rogerio atu hela nafatin iha Malayzia, maibe Rogerio tenki fila mai Timor hodi kompri fali ninia sentense nebee mak tribunal disidi tinan 7 fulan 6 nee.

Hanesan ema hotu hatene katak prizeineiru Rogerio aluga aviaun modelu jet, wainhira ba halao tratamentu iha nasaun Malaysia, nebee Rogerio husik hela nasaun Timor iha data 9 de Augostu liu nee. Akompanha Rogerio ba halao konsulta nee mak hanesan ninia kaben no oan nain rua, nomos primu nain rua.

Prosesu Rogerio atu aranka hodi ba halao tratamentu iha nasaun Malayzia nee rasio, antes nee governu liu husi Ministra da Justisa, Lucia Lobato no Prokurador Jeral, la husik Rogerio atu sai, tanba seidauk iha autorizasaun husi parte governu. Maibe, depois liu husi prosesu negosiasaun nebee naruk.

Kinta (09/8), parte Tribunal Distrital de Dili liu husi juiz Ivo Rosa fo desizaun hodi autoriza Rogerio aranka ba nasaun Malayzia hodi kontinua halao tratamentu saude.

Rogerio Lobato ba halao tratamentu iha nasaun Malayzia hodi aluga aviaun ida nebee uza osan estadu hamutuk US$30.000. arm