sexta-feira, 9 de novembro de 2007

Prostituisaun Estranjeiru Uza Visa Sala * Ukun Nain Balun Involve

Edition: 08 November 2007

DILI–Autoridade kompetente tenki fo atensaun makas ba hahalok restorante balu iha Dili laran, nebee halao aktividade dupla. Alein serbi han-hemu maibe mos aktivista sex komersiu, nebe lori feto prostituta barak mai husi estranjeiru ho visa turista iha TL.

“Nee hau hare tenki iha pasu konkretu ida husi ministeriu justisa ka liu-liu husi parte imigrasaun para atu cek didiak ema sira nee (prostituta –red) nia visa tama mai iha ita nia rai. Tanba dala barak feto estranjeiru sira nebe agora buka moris iha restorante iha Dili laran halo prostituisaun,” klarifika Deputada Virginia Ana Belo iha sesaun plenaria Parlamentu Nasional (PN), Kuarta (7/11).

Aktividade prostituisaun liu-liu mosu iha hotel ida besik Stadion Municipal Dili nia oin. Esperensia dala ida nee nia nain konvida membru PN sira ba iha fatin neba hodi deklara katak harii hotel para loke servisu ba feto TL no mos feto husi estranjeiru. Mas relaidade hatudu feto barak liu inporta mai husi estranjeiru i sira nia hatais laos hanesan ema servedor restorante, maibe sira hatais ropa badak (mini) nebee la susar hamosu interpretasaun negativu.

Tan nee husu ba meja ou liu-liu Komisaun A nebee kompetente iha area refere para cek didiak aktividade hotel bo-boot iha Dili laran, tanba iha oin hotel, maibe iha kotuk loke pratika prostituisaun.

Nia mos husu ba governu tenki pasa revista feto estranzeiru sira nia visa para bele identifika sira nia objetivu mai iha TL. Mai hanesan turista ka, mai atu halo negosiu. Ida nee presiza klarifikasaun ba publiku.

Praktika prostituisaun husi ema estranjeiru nee halo mos iha Bairro dos Grilos nebe iha uma oin loke salon maibe uma nia kotuk halo pratika prostituisaun. Nunee mos iha Bairro Formosa besik Centro nia oin nebe iha kombinasaun feto oan TL ho Indonesia.

Tuir Virginia, indikasaun nee, tanba feto sira iha neba hatais oin selu-seluk los no estraga mentalidade joventude nebe konsideradu futuru nasaun TL nian. Nunee mos iha joventude barak mak deskobre katak iha fatin sira nee bele uza feto sira nee ba vida sexual. Laos deit jovem, maibe ukun nain nasaun nee nian balun mos involve hamutuk iha vida ida nee.



Kria Lokalizasaun

Virginia mos suzere atu governu tenki kria lokalizasaun para akumula prostetuta sira iha fatin ida para governu bele kontrola no prevende moras HIV/AIDS. Hafoin buka dalan kria aktividade positivu hodi fasilita prosesu rehabilitasaun para feto sira bele fila moris normal. Tanba iha parte ida presiza ema hotu hatene katak feto sira nebee pasa vida prostitusaun iha TL mos selu taxa ba governu, signifika katak haboot income ba nasaun.

Razaun Virginia levanta kestaun nee iha plenaria ho intensaun atu fanu deputadu tomak nia konsiensia, liu-liu deputadu feto maluk nebe dala barak luta makas ba dignidade feto nian.tor