Ohin, Delegasaun Konselhu Seguransa ONU Too Iha Dili

Edition: 27 November 2007

DILI – Delegasaun Konselhu Seguransa Nasoens Unidas nian, tuir planu, ohin Tersa (27/11), too iha Dili, hodi halao vizita official durante loron haat (27-30/11) iha Timor-Leste. Visita nee ba dala rua hafoin Timor-Leste hetan independensia iha 2002 liu ba.

Delegasaun nebee kompostu husi membru nain hitu husi nasaun 15 Konselhu Seguransa nian ba tinan 2007 mak hanesan husi, Afrika Sul, Ambassador Dumisani Kumalo, hanesan xefi missaun no Petrus Sipho Seakamela, assistente xefi missaun, Deputy Representante Permanente Republika Popular China, Ambassador Liu Zhenmin, husi Republika Democratic Congo, Luc Joseph Okio, Republic Indonesia, Muhammad Anshor, Diana Eloeva husi Federation Russian, Ambassador Peter Burian husi Slovakia no Representante Estados Unidas America ba ONU, Ambassador Jackie Wolcott.

Durante halao vizita iha iha Timor-Leste, delegasaun nee sei halo enkontru ho Governu, Procurador Jeral Republika, lider partidu opozisaun, Eis PM Mari Alkatiri no Estanislau da Silva, Representante Espesial Secretario Geral Nasoens Unidas iha Dili no Bispo Diocese Baucau no Diocese Dili, liders partidu politiku, grupus feto nian no NGO iha Dili.

Komitmentu husi Konselhu Seguransa nian nebee sei fo sai iha visita alto nivel nee mak Soberania, independensia, integridade territorial no unidade nasional ba Timor-Leste, atu nunee promove estabilidade ba tempu naruk intermu teritoriu tomak.

Tuir informasaun nebee diariu nee kobre husi Ministeriu Negosi Estranjeiru hatete, iha loron (28/11) delegasaun sei hasoru malu Bispo Diocese Dili, Don Alberto Ricardo da Silva, no ex-Primeiro Ministros Mari Alkatiri no Estanislau da Silva. Iha loron hanesan delegasaun nee akompanha husi Deputy SRSG Eric Tan sei halo visita ba distritu Liquiça hodi hasoru malu ho Administrador Distrito Liquiça, liders partidu poliku reprersentante sira seluk.

Iha Kinta (29/11) delegasaun nee akompanha husi Deputy SRSG Reske-Nielsen sei halo visita ba distritu Baucau hodi hasoru malu ho Administrador distrito Baucau, liders portidu politiku, representante local, no sei halo visita ida ba projeto Escola ida iha Baucau. Depois fila husi Baucau delegasaun nee sei hasoru malu ho organizasaun feto nian, liders partidu politiku nomos ONG sira iha Dili.

Ultimo dia loron visita, delegasaun nee sei halo visita ba kampu deslokadu Jardim–Kolmera, visita ba Kuartel Jeral UNPOL/PNTL nomos halo visita ba Kuartel Geral F-FDTL iha Tasi Tolu. Iha loron nebee hanesan delegasaun nee mos sei hasoru malu ho Procurador Geral, Provedoria Direiotus Humanos. dd