sexta-feira, 9 de novembro de 2007

Major Alfredo Husu Puvu Hakmatek* Ba Ponta Leste

Edition: 08 November 2007

MANUFAHI – Major Alfredo Reinado Alves husu ba povu atu hakmatek hodi hein prosesu dialogu nebee mak atu trasa dau-daun ona iha tenpu badak.

Atu hakat ba dialogu, Major Alfredo promete atu tuun ba distritu hotu-hotu, inklui distritu Ponta Leste (Viqueque, Baucau no Lautem) hodi sosializa ba povu para tuur hakmatek hodi hein prosesu dialogu.

“Hau iha responsabilidade moral atu tuun ba distritu hotu-hotu hodi sosializa para sira bele tuur hakmatek hodi hein prosesu dialogu,” dehan Alfredo ba STL ho Radio Komunidade iha Manufahi, Same, Sesta (2/11).

“Ema sira nebee maka hakarak soran imi, fo osan ho tua para imi hemu halo buat sira nee, sira nee maka ema aat. Lakohi estabilidade iha ita nia rain.”

Alfredo grantia ba ekipa Task Force nebee governu harii nee iha duni responsabelidade boot atu fo demokratiku lolos ba rai ida nee. “Komprimisu boot ida nee hau maka sei tuun rasik u ba distritu no instituisaun hotu-hotu para bele fo grantia buat ida ita dehan sosializasaun ba ita Timor oan hotu para bele hakmatek hodi fo tempu mai ami para hodi diskoti buat nee tuir nia dalan los.”

Nia dehan, nudar militar, nia iha obrigasaun atu servi rai no povu ida nee hodi grantia lori paz nee tama uma sai uma. No nia garante mos katak nia sei lori hikas maluk refusiadu sira fila ba ida-idak nia horik fatin.

“Ita tenki moe, ita sai refusiadu iha ita nia rain rasik iha tan capital Dili (ibu kota negara) I buat idake keleur ona la rezolve. Pior liu tan, ema balun uza fali refusiadu sira hanesan buat bisnis, nunee mos Internasional sira uza fali krizi nee hanesan lahan bisnis ida,” Alfredo dehan.

Liu tan, nia apela ba joventude hotu atu pasensia (sadar) hodi hare didiak ba evolusaun politika nebee iha hodi la bele sai fali material (alat) ba ema seluk nia interese politiku hodi hetan kadeira. Tanba nee, Timor oan tenki hadomi malu, paz malu, hela ho dame, respeita malu. Lalika todu malu lori fali Artimartiais (perguruan) para sobu Timor oan rasik.

Tuir nia, hahalok violensia tenki hakribit ona hodi harii unidade lolos para granti fali paz iha nasaun nee. Needuni, ba jovemtude ho maluk intlektuais sira, liu-liu ba maluk sarjanah super mie sira, atu kria paz no unidade iha futuru. Paz la iha, maka nakukun sei falun joventude nia futuru.

“Hau fiar katak imi sei lori nasaun nee ba oin. Ba joventude 13 distritu hadomi malu ba, haluha sai vitima ba ema seluk nia intrese, tanba ita Timor ida deit so Timor ho Timor maka bele rezolve problema Timor,” Alfredo hatutan.gus