Timor Leste: Dom Alberto Sei Reza ba Parlamentu Foun

Edition: 31 July 2007

DILI— Amo Bispu Diocese, Dili, Dom Alberto Ricardo da Silva hatete, nia sei reza makaas atu tulun Presidente Parlamentu (PN) Foun Fernando “Lasama” Araujo atu lori rai doben TL ba oin ho susesu.

“Hau nia hanoin tenki iha koperasaun no kolaborasaun makaas atu hanoin fo liman ba malu ajuda governu nia servisu to remata,” Alberto Ricardo hatete lia hirak nee ba jornalista, bainhira partisipa iha seremmonia tomada de pose ba membru PN foun periodu 2007-2012 iha Uma Fukun PN, Dili, Segunda (30/7).

Timor oan tomak tuir Amu Ricardo tenki fo liman ba malu, atu bele servisu diak ba romaon foun nasaun doben Timor Leste. Ho nunee mak nia espera katak Igreja tenki servisu hamutuk ho orgaun soberania hirak nee atu lao ba oin.

Timor Leste tuir nia majoria ema katolika, ida nee tuir nia houri uluk, houri uanin kedas mesak ema sarani deit. “Hau nia hanoin eleisaun foin liu ba nee lao mos ho diak, semte ho dignidade ho esperansa katak timor oan tomak fo liman ba malu, roman foun nebe atu mai dadauk ita nia rain.”

Nia husu, liliu matenek no lia nain sira atu sukat didiak ho neon i laran diak ho kapasidade intelektual nebee iha maromak nia tulun hot-hotu bele kopera hamotukhodi lori nasaun nee ba oin.

Iha fatin hanesan, Presidente Musulmanu TL, Arif Abdullah Sagram hatete, nudar presidente musulimanu iha TL iha espetativa boot tebes ba PN foun atu bele fo buat ruma diak ba nasaun doben Timor Leste. Nebee lao benefit laos deit ba komunidade islam, maibe ba komunidade Timor tomak.

Iha fatin hanesan, Presidente PUN, Fernanda Borges hatete katak nia iha esperansa boot ba parlamentu foun bele halo buat diak ruma ba rai doben Timor nebee sei infrenta hela krizi politika. “Maibe ita tenki fiar katak nee deside husi povu, povu fo oan sira nia fiar membru PN nain 65 para bele halo buat ruma diak ba ita nia nasaun nee ba oin. Hau hanoin ita tenki ser fiar ho laran atu lori nasaun nee ba oin ho diak,” nia hatete.

Fernanda hatete, nasaun TL hetan susesu boot iha eleisaun liu ba. Eleisaun nebee lao ho u demokratiku bele haburas tan demokrasia iha nasaun foun nee. “Agora povu fahe votus nee ba partidu laiha ida ke manan ho votus majoria, nebe atu halo konforme nia hakarak maibe dadauk tama iha parlamentu laiha ida ho majoria, nee rezultadu diak ida ba povu TL,” nia esklarese.

Nia dehan parlamentu hanesan reprezenta povu tenki haree liu ba povu nia aspirasaun no nesesidade baziku nebee sei sai hanesan problematiku iha nasaun nee. tan nee nudar deputadu tenki tau matan liu ba povu nia moris.car


Edition: 31 July 2007
DILI – Partidu Fretilin ‘ngotot’ nafatin atu forma governu, mesmu kadeira nebee sira hetan iha parlamentu nasional la sufisienti atu hametin pozisaun governu iha PN.

Kadeira nebee partidu Fretilin hetan iha eleisaun lezislativa 21 deit. Kadeira Fretilin nian iha Parlamentu Nasional nee, sei dook husi standar maioria parlamentar nebee tenki hetan 33 kadeira ba leten.

Fretilin hakarak nafatin atu forma governu tanba, sai nudar partidu mais votadu pemenang iha eleisaun liu ba. “Iha konstituisaun la hatete atu forma governu tenki iha majoria kadeira parlamentar. Konstituisaun hatete partidu mais votadu,” dehan Sekretariu Jeral partidu Fretilin Marii Alkatiri ba jornalista iha uma fukun Parlamentu Nasional Segunda (30/7).

Maibe, Sekretariu Jeral Fretilin nee la klarifika hotu kontituisaun Artigu 106 pontu 1, nebee hatete, “Primeiru Ministru hili husi partidu nebee iha votu barak liu ka husi aliansi partidu sira nebee iha nia ema barak iha Parlementu, no nomeasaun husi Prezidenti Republika wainhira rona tiha partidu politiku sira nebee iha reprezentante sira iha Parlementu.”

Neduni, eis Primeiru Ministru nee fiar katak bainhira Prezidenti Republika Ramos Horta kaer prinsipiu partidu mais votadu mak iha direitu forma governu, entaun sei bolu partidu Fretilin. Atu buka majoria parlamentar nee sei hanoin iha ikus mai. “Se prezidenti kaer ida nee sei bolu Fretilin. Depois, mak majoria iha parlamentu nee hetan ka la hetan,” katak Marii.

Tuir nia hanoin, too agora Prezidenti Republika seidauk fo sinal positivu ba Fretilin ka Aliansi Majoria Parlamentar (AMP) atu forma governu. Maibe, aban bainrua bele ona foti desizaun. “Too agora seidauk iha sinal ba ema ida, tuir hau nia hanoin.”

PM Fretilin

Alkatiri hatete, husi reuniaun nebee mak halao iha Comite Central Fretilin (CCF) sei nafatin nia atu sai Primeiru Ministru. “99,99 pursentu sei hakarak nafatin hau sai Primeiru Ministru.” Maibe, nia sei la lakohi, tanba iha ema alternativa barak iha partidu Fretilin nia laran.

Konaba eleisaun Prezidenti Parlamentu Nasional nebee kandidatu husi partidu Fretilin Aniceto Guterres Lopes lakon ho kandidatu AMP Frenando Lasama de Araujo, tuir nia nee normal. Demokrasia tenki iha ema lakon no manan.

Nia hatutan, nee hatudu katak povu hakarak halo mudansa lao lalais. Neduni, husi nee ba oin hotu-hotu tenki kolabora para iha mudansa lao diak liu tan, laos sai aat.dd