Timor Leste: Joven Tenki Hakribi Violensia

Edition: 09 August 2007

Amu Ricardo: Joven Tenki Hakribi Violensia

DILI—Bispo Diocese Dili, Mgr. Alberto Ricardo da Silva, apela ba sarani tomak, liu-liu ba juven sira atu haree ba oin hodi buka kontribui ba dezenvolvimentu no hakribit violensia nebee lori sofrementu naruk ba povu rai nee.

“Ita hotu tenki agradese buat nebee importante liu ba Timor oan tomak, katak mezmu problema barak mak mosu rai laran, hanesan violensia no defikuldades oin-oin, nasaun nee sei iha kbiit atu bele forma governu ida. Nee positivu teb-tebes, maibe importante liu agora ba oin povu tomak tenki hakribit violensia,” Amu Ricardo hatete ba jornalista sira hafoin partisipa iha seremonia tomada de pose ba kuatru governu konstitusional iha Palacio do Nobre, Lahane, Dili, Kuarta (08/8).

Nia haktuir, buat nebee importante liu ba sidadaun tomak no liu-liu ba juventude, mak oinsa fo kontribuisaun ba kuatru governu konstitusional atu bele halao sira nai programas tomak ho susesu. Husu ba governu foun ida nee atu oinsa buka hadia buat nebee presiza hadia.

“Tempu ona atu fo hanoin ba malu no tempu ona atu hakribit buat nebee la diak no buka hakas aan atu bele hakiak unidade nasional, buka fo liman ba malu lori nasaun ida nee ba futuru,” Amu Ricardo tenik.

Nia senti triste bainhira sidadaun hotu, liu-liu joventude hanesan jerasaun futuru lakohi buka kolobora hamutuk ho governu foun ida.

Nia dehan, governu mak estadu, tanba nee kaundu ema hotu la fon kontribuisaun, maka nasaun nee sei lalao ba oin, no ema hotu sei moris kiak nafatin.

“Agora ami nia papel nudar Igreja Katolika maka fo kontribuisaun ba governu foun ida nee halo formasaun ba sidadaun no fo edukasaun ba ema hotu atu bele fo kontribuisaun ba governu ida nee atu lao diak. Hanesan Premeiru Ministru Xanana Gusmao nia deskursu kualia katak atu ajuda igreja ida nee mos dalan diak ida atu bele fo susesu ba formasaun no edukasaun nebee oras nee igreja halao,” Amu Ricardo sublinha hikas. ino