TIMOR LESTE: Investigador Hetan Osan Valor Boot Iha Bolsu Alfredo

Edition: 26 February 2008

DILI-Prokurador Geral Republika (PGR), Longuinhos Monteiro informa katak ekipa investiador hetan evidensia seluk iha mate isin Alfredo Alves Reinado nia bolsu ho osan valor boot dolar Amerikanu.

“Hau rasik seidauk haree, maibe husi informasaun nebee hau simu katak, los duni, iha Alfredo nia bolsu iha osan valor boot tebes,” hatete Longuinhos ba jornalista sira iha nia servisu fatin, Kaikoli, Dili, Segunda (25/2).

Mesmu Longuinhos konfesa osan nebee refere, maibe nia la hatete sai lolos osan valor boot nee hira. Maibe, nia hatete, husi parte investigador sei haree numeru seri osan hirak nee no sei husu ba banku iha Australia ho Indonezia para bele konfirma osan sira nee sai iha banku ida nebee.

PGR Longuihos Monteiro hamutuk ho ekipa FBI (Federal Boreu Investigation) husi nasaun Estadus Unidus, AFP (Australian Federal Police) husi Austrialia ho ekipa investigador UNPol, Sabadu-Domingu (23-24/2) halao rekonstruksaun iha rezidensia Prezidensi Ramos Horta, Metiaut, relasiona ho kazu atentadu oho Prezidenti.

Prosesu rekonstruksaun nebee hahu husi tuku 14.00-18.00 Otl la kompletu, ho nunee, prosesu rekonstruksaun nee kontinua tan fali iha loron Domingu komesa iha tuku 09.00 dader too remata.

Longuinhos mos hatete katak iha rekonstruksaun nee halo dezenhu tres dimensaun ninian para atu fasilita ema nebee mak aban bain rua hetan depoimentus ruma ka ema ruma involve para fasilita liu tan atu indika area konbertura pena de krimi nian.

Ekipa sira nee mos halo scanning ho apereilu sira nian no hetan mos kilat musan 14 no rekoila hotu kedan, no prosesu rekonstruksaun hanesan nee iha tempu besik sei halao tan iha Balibar.

Tuir Longuinhos katak kilat musan sira nee ninia kalibre 5,56 milimetrus nebee uza ba kilat sira hanesan HK-33, M-16, ho FNC nee uza kilat ho milimetrus hanesan.

Hafoin rekoilamente, ekipa sei halo izame balistiku iha semana oin nee. Dalawain sei halo tes fairing atu lori ba laboratorium Australia. Husi ekipa nee rasik sempre halo enkontru ou briefing lor-loron konaba dezenvolvimentu ba prosesu nee.

Maibe iha briefing lor-loron nee laos deit ho sira ekipa forensic maibe hamutuk mos ho investigador UNPol ninian, nebee sempre servisu hamutuk ho ekipa FBI ho AFP.

Longuinhos mos hatete katak provizoriamente evidensia nebee mak rekoila husi rekonstruksaun nee mak kilat musan deit, no sei halo three da image para bele lokaliza fatin nee ho diak para aban bainrua bele lokaliza prosesu nee lao oinsa.

Atentadu oho Prezidenti da Republika Jose Ramos Horta ho Primeiru Ministru Xanana Gusmao nee akontese iha Metiut no Balibar, Segunda (11/2) foin lalais nee.

Iha atentandu nee Prezidenti Ramos hetan tiru no eis Komandante Polisia Militar, Major Alfredo Alves Reinado ho ninia membrus Leopoldino Exposto mate iha fatin akontesementu.

PM Xanana Gusmao mesmu hetan asaltu tiru husi grupu Gastao Salsinha, la hetan kanek.

Atentadu Oho PR Horta Planeiadu

Prokurador Geral da Republika, Longuinhos Monteiro deklara katak problema kazu atentadu oho Prezidenti da Republika, Jose Ramos Horta iha ninia rezidensia Metiaut, Segunda (11/2) foin lalais nee, planeiadu husi grupu eis Komandante Polisia Militar Alfredo Alves Reinado, bazeia ba mapa nebee investigador sira hetan.

“Mapa (peta) nee iha indisius forte katak atentadu hirak nee planeiadu antes tiha ona husi matebian Alfredo no ninia grupu, ami mos halo tiha ona konfirmasaun katak mapa nee Alfredo mak halo,” hatete Longuinhos.

Tuir Longuinhos katak mapa nee nudar evidensia nebee mak importante hodi suporta tan parte ekipa ninia investigasaun hodi hatete katak atentadu tiru hasoru Prezidenti Jose Ramos Horta nee planu antes kedan, tanba iha mapa ida nebee mak investigador sira foti husi Major Alfredo Reinado nebee mak mate iha Tempat Kejadian Perkara (TKP).

Longuinhos mos hatete katak iha mapa laran nee Alfredo dezeina espesifikamente area Prezidenti Horta ninian rezidensi, no iha mos pontu tolu nebee mak sira determina tiha ona hanesan kolokasaun membrus hodi halo kobertura iha rezidensia PR Horta, tantu iha foho leten no iha area tasi ninian.

Prokurador Jeral nee mos hatete katak konaba planeia atentandu nee sein duvidas no 100% bele dehan nee planeiadu. Tuir Longuinhos katak iha mapa laran nee dezaina uma PR Horta ninian. Tama iha rezidensia nee husi nebee no sai husi area PR Horta nia rezidensia nee husi dalan nebee. arm